Accessibility links

...oçraşuda Tatarstannıñ iñ yaña tarixınnan qızıqlı faktlar kiterelde…


...oçraşuda Tatarstannıñ iñ yaña tarixınnan qızıqlı faktlar kiterelde…

Prezident qunaqlarğa Tatarstannıñ perestroyqa yıllarınnan başlap xäzerge köngäçä ütkän säyäsi häm sotsial'-iqtisadi yulın, yunäleşen söyläp birde. Soñğı 10-15 yılda Tatarstan uzğan yul turında Prezident tarafınnan täfsille, centekle bäyälämälär, analizlar şaqtıy işetelgän bulsa da, oçraşuda qunaqlar öçen genä tügel, tatarstanlılar, jurnalistlar öçen dä tağın da täfsileräk, qızıqlıraq faktlar, tarixi mizgellär turında söylände. 90-nçı yıllar başındağı Tatarstandağı wäzğıät turında söylägändä, Mintimer Şäymiev bez ul yıllarda “ütken pıçaq östennän ütkändäy buldıq”, dide. Çönki oppozitsiädäge milli xäräkät, milli oyışmalar Rusiädän tulı bäysezlek taläbe belän çıqtılar. Ä respublikanıñ başqa millät wäkilläre Rusiädän ayırılıp çığuğa qarşı buldılar. Boris Yel'sinnıñ Qazanğa kilep, xalıq aldında “küpme telisez, şulqadär suverenitet alığız”, dip çığış yasağanı turında da qızıqlı tarix söylände. Xalıq belän oçraşqannan soñ häm şundıy süzlär äytelgännän soñ kiçen “inde xäzer nişlärgä, bu bit mömkin närsä tügel” dip äytkän ikän. Şunnarı soñ mäğlüm wäqälätlär büleşü turındağı şartnamä ideyäsı täqdim itelgän.

Mintimer Şäymiev äytüençä, menä şulay, şuşı yıllar däwamında Tatarstan citäkçelege xalıqnıñ mentalitetın añlap, real' säyäsät alıp barırğa tırışqan. Federal' üzäk belän Tatarstan arasındağı xäzerge mönäsäbätlär turında söylägändä, Mintimer Şäymiev Vladimir Putinnıñ Prezident bulıp saylanğaç, berençelärdän bulıp Tatarstanğa kilüen iskä aldı. Şul waqıtlarda alar arasında ber salım qırına kerü turında, ämma respublikada xalıqnıñ tormış däräcäsen tübänäytmäw öçen maxsus sotsial'-iqtisadi üseş programması qabul iteläçäge turında söyläşülär bulğan.

Älbättä, Konstitutsiälärne täñgälläşterü turında da äytelde. Prezdent “Tatarstan Konstitutsiäsenä östämälär häm tözätmälär turındağı” qanun proektı berençe uqılıştağıça qabul iteler, dide. Çönki ul tözätmälär, östämälär säyäsi realiälärdän çığıp eşlängän. Rusiä, hiçşiksez, federativ däwlät bulırğa tieş, bu bezneñ nıq pozitsiäbez, dide Mintimer Şäymiev.
XS
SM
MD
LG