Accessibility links

дүшәмбе, 5 декабрь 2016, Казан вакыты 11:29

… häm Mintimer Şäymievkä öç soraw birde: Tatarstanda Amerika bankları wäkilçelekläre açu, İslam däwlätlärennän studentlar kiterep uqıtu mömkinlege häm Çeçnya problemasın çişü yulları turında


… häm Mintimer Şäymievkä öç soraw birde: Tatarstanda Amerika bankları wäkilçelekläre açu, İslam däwlätlärennän studentlar kiterep uqıtu mömkinlege häm Çeçnya problemasın çişü yulları turında

Kereş süzdän soñ Aleksandr Verşbou Mintimer Şäymievkä öç soraw birde. Şulay itep, sorawnıñ berençese şul uq keçe häm urta biznesqa yärdäm nisbätennän Tatarstanda Amerika bankları wäkilçelekläre açıp, kreditlar açu mömkinlege. İkençese, Tatarstandağı dinara tatulıq, totrıqlılıq wäzğıäten İslam däwlätlärennän, Sägüd Gäräbıstannan, Päqıstannan studentlar kiterep uqıtu, öyrätü mömkinlege. Öçençe soraw Çeçnya problemasın çişü yulları turında buldı. Mintimer Şäymiev ilçe sorawlarına yartı säğät däwamında täfsille cawaplar birde. Amerikanıñ Exim-bankınıñ töbäk bülegen buldıru eşenä yaña impul's bireläçäge turında äytelde. Rekonstruksiä häm üseş Europa banğı belän KamAZ burıçları buyınça üñışlı xezmättäşlek misalı kiterelde. Ä inde tağın ike yıldan banklarğa ipoteka kreditları, toraq tözü kreditları öçen bik zur mömkinleklär bulaçaq. Çönki ike yıldan tuzğan toraq programması ütälgännän soñ iñ moxtac ğailälär känäğätländerelgäç, Tatarstanda tüläwsez toraq tözü bulmayaçaq. İkençe sorawğa cawap birgändä, Prezident respublikada İslam dine üseşendä kilep çıqqan qarşılıqlar imamnar äzerläw problemasına tuqtaldı. Anıñ fikerençä, çınnan da İslam ruxaniları Qazanda äzerlänergä tiyış. Çönki monda Rusiädä berençe İslam universitetı açıldı, şulay uq dönyawi belem birü öçen mömkinleklär küp. Çeçnya mäsäläse buyınça söylägändä, Mintimer Şäymiev problemanı köç belän xäl itü qararı Rusiä säyäsätendä zur xata buluın, häm monı xakimiättän keter aldınnan Rusiäneñ berençe Prezidentı Boris Yel'sinnıñ tanuın iskä aldı. Boris Yel'sin ber waqıt, xätta, aña Dudaev belän oçraşırğa äzer buluın da äytkän bulğan. Läkin nindider bilgesez köçlär tä'sirenä birelep, bu telägennän waz kiçkän.

Mintimer Şäymiev fikerençä, etnik çistartular berkemgä dä röxsät itelmägän. Säyäsi çişeleş yulların ezlärgä kiräk. Aleksandr Verşbou Mintimer Şäymievneñ cawaplarınnan känäğät qaluın häm räxmät äytte. Şunnan soñ ul Tatarstan Prezidentınıñ tışqı elemtälär departamentı urnaşqan binada Tatarstan Diniä nazaräte räise möfti Ğosman xäzrät İsxaqıy, Qazan häm Tatarstan arxiepiskopı Anastasiy ataqay belän oçraştı.

Şul uq könne kiç Amerika Quşma Ştatlarınıñ Rusiä Federatsiäsendäge ğadättäntış häm tulıwaqälätle ilçese Aleksandr Verşbou Respublika milli kitapxanäseneñ Amerika zalında Amerikada belem alıp qaytqan ğalimnär häm belgeçlär belän oçraştı häm şunıñ belän Tatarstanğa öç könlek vizitın tämamlandı.

“Azatlıq” radiosı öçen Qazannan Yunıs Ätnäle
XS
SM
MD
LG