Accessibility links

якшәмбе, 11 декабрь 2016, Казан вакыты 05:23

8 mart — Güzällär bäyräme


8 mart — Güzällär bäyräme

8 martta Qazan uramnarı beraz buşap qaldı. Moña xätle bazarlarda, kibetlärdä häm şul uq uramnarda yörerlek tügel ide. Küräseñ, 7 martta xatın-qızlar bäyrämeneñ iñ yuğarı noqtası — apafeozı bulğandır. Çönki qotlawlarnıñ şaqtıy öleşe eş könenä turı kilä bit. Kiçä yaxşılap bäyräm itep arığan ir-yegetlär häm xatın-qızlarıbız 8 martta, härxäldä, anıñ berençe yartısında, öylärendä xäl cıyıp yatqannardır. Yarıy äle, bu datanı xökümät yal köne dip iğlan itkän ide.

Süz uñayınnan äytergä kiräk, mäğlümät çaraları atna buyına xatın-qızlar temasın törle yaqtan kiñ yaqtırttılar. Rusiädä, mäsälän, xatın-qızlar sanı 76,5 million ikän. Yäğni 100 xatın-qızğa 88 ir-at turı kilä. Ä soñğılarınıñ salıp-nitep, cinayät qılıp törmälärdä, ä öleşe xärbi xezmättä ikänen dä isäpläsäk, cünle ir keşeneñ bügen şaqtıy defitsit ikänenä ışanırğa bula. Mäğlüm ki, ir-yegetlär oşbu bäyrämdä aqça yançıqların buşatırğa mäcbür. Xatın-qızlarnı qotlarğa Rusiä irläre 103 milliard sum aqça sarıf itälär ikän. Bu ilneñ 2002 yıldağı byudjetınıñ 5 % täşkil qıla.

Älege atnalıq ağartu programmaların tıñlap, bez tağın menä närsälärne açıqladıq. Rusiädä xatın-qızlarnıñ 7 % berkemnän dä büläk almıy, ä 6 % alırğa da telämi. Xäyer, qayber ir-yegetlärneñ büläk birerlek mömkinlekläre dä yuq. Şulay da, bu atnada törle däräcädä güzäl zatlarıbızğa komplimentlar kilogrammlap häm tonnalap äytelde. Yarıy äle, yaxşı süz äyter öçen kesägä kerergä kiräk tügel. Xäyer, cılı süz can azığı digändäy, irkälänergä öyränmägän xatın-qızlarıbız monısına da räxmätle buldılar kebek.
XS
SM
MD
LG