Accessibility links

шимбә, 3 декабрь 2016, Казан вакыты 22:48

Konstitutsiäneñ yaña redaksiä tiräsendäge bäxäslär däwam itä


Konstitutsiäneñ yaña redaksiä tiräsendäge bäxäslär däwam itä

Bäyräm şawqımı Konstitutsiäneñ yaña redaksiä tiräsendäge bäxäslärne beraz tomalap torsa da, qayber gazetalar töp zakonnı inde bastırıp çığardılar. Matbuğatta räsmi häm ğayre räsmi keşelärneñ fikerlären dä bäyän itä başladılar. «Восточный экспресс» gazetası, mäsälän, comğa könne Tatarstan Däwlät Sovetı deputatı Yösıp Yaqubovnıñ «Xalıq nik däşmi?» digän zur mäqäläsen bastırıp çağardı. Ğadättä, Ştaninnı häm başqa berniçä keşene iskä almağanda, bezneñ parlament deputatlarınıñ kübese üzlären sorı tıçqannarday totalar. Yäğni, artıq küzgä taşlanmıylar, çığışlar yasamıylar, yışraq cilneñ qay taraftan isüen belergä tırışalar. Bu yulı Yösıp äfände şaqtıy qıyu çığış yasağan. Anıñ fikerençä, tatarstanlılar Rusiä avtoritarizmnan örkemilär, çönki suverenitet birgän cimeşlärne üzläreneke dip tügel, ä vlast' tiräsendäge keşelärneke dip sanıylar.

Xalıq deputatı Ministrlar Kabinetınıñ küptän tügel uzdırğan vertikal'ne nığıtuında federalizmnı bozunı kürä. Yäğni, Mäskäw monı eşläsä, bez anı tänqıytlibez, ä üzebez şul uq tırmağa basabız. Biredä süz rayon xaqimiätläreneñ wäqälätlären çikläp, qayber funksiälärne ministrlıqlarğa birü turında bara.

Häm, nihayät, deputat qayçan saylawlar bulır digän sorawnı da quya. Anıñ süzlärenä qarağanda, şähär häm rayon xaqimiäte başlıqların saylawnı 2002 yılnıñ axırına bilgelärgä bula. Ä inde iyündä parlament Konstitutsiäneñ yaña redaksiäsen häm saylawlar turındağı qanunnı qabul itsä, cäyge kanikuldan soñ bu ğamälgä start birergä bula.

Mäqälädä tänqıytne yomşartırğa teläp bulsa kiräk, avtor Mintimer Şäymievqa komplimentlar yullıy häm bügenge parlament saylanğan waqıtın eşläp beterergä tiyış dip sanıy. Xätta redaksiä üze dä älege yazmanı bäxäsle wä radikal' dip atağan. Xäyer, berençe qaraşqa ğına bu şulay toyıla kebek. Üz fikeren özderep, turıdan turı äytü demokratik cirlektä tabiğıy närsä tügelme? Häm moña qayçandır öyränergä dä kiräkter bit. Bigräk tä xalıq deputatlarına.

Damir Ğismetdin
XS
SM
MD
LG