Accessibility links

Кайнар хәбәр

Amerika tawıqların Rusiädä satu turında Tatarstanda ike qaraş bar


Amerika tawıqların Rusiädä satu turında Tatarstanda ike qaraş bar

Şulay da, Mäskäw televideniäse xäbär itüençä, Alexander Vershbow Amerikada üsterelgän tawıq botların satu tıyılğaç, bik küp räsmi wäkillärgä şaltıratıp, problemanı çişärgä tırışqan, üz argumentların kitergän. Tatarstanda da Amerika tawıq botları xätsez cıyılğan ikän. Tağın ber ay satırlıq zapas bar. Tatarstannıñ baş veterinarı elek kiterelgän tawıq botları satılıp betäçäk digän. Intertat.ru internet gazetasınıñ mäğlümätenä qarağanda, alar sıyfatlı häm Rusiä tawıqlarınnan 15-20 protsentqa oçsızraq. Tawıq satunı kimetü dä, qorıçnı satunı qısırııqlaw da şaqtıy zur aqça zıyanı kiterä. Mäğlümät, iqtisad, säüdä ölkäsendä suğışmıyça torsañ, här ike yaqqa faydalı bulır ide.

Yäkşämbe könne “Azatlıq” radiosı aşa xäbär itüebezçä, Tatarstan milli kitapxanäseneñ Amerika zalında bulğan oçraşuğa 30-dan artıq käsepçe häm belgeç cıyılğan ide. Alar barısı da Amerikağa baru mömkinlege tudırğan häm uqu programmaları buldırğan öçen ilçe Vershbowğa qat-qat räxmät uqıdı. Äytergä kiräk, bu Amerikanı yaratuçılar arasında däwlät çinovnikları häm räsmi byurokratiägä yaqın käsepçelär buldı.

Başqa fikerlär dä bar ikän. “Aq bars-Piträç” dip atalğan agrofirmanıñ citäkçese Amerikan tawıqlarınıñ sirağın qısqartuğa şatlanuın belderde. Berençedän, çit il tawığı awıru sanala, üzebezneke sıyfatlıraq. Cirle tawar satılğaç, Rusiä qoşçılığına uñaylı şartlar tua. İkençedän, Tatarstan tawığı beraz ğına qimmäträk buluğa qaramastan, anı satıp bulaçaq. “Tatarstan-İtoği nedeli” digän tapşıruda şuşı patriotik reportaj qabatlap kürsätelde. Ğadi awıl keşeläre häm şähärdäge urta xälle häm fäqirräk keşelär oçsız äyberne yaratsa da, çit ildän it qaytaruğa şatlanmıy. Menä şulay, zur säyäsät häm diplomatiä ike tawıq botı arasına butalğan qorıç çıbıqlarğa oşap kitä. Çınlap ta, çit il investitsiäläre qaya, küpme kergän, şul uq Amerika belän nindi alış-bireşlär kemgä fayda kitergän – anısın cünläp belgän keşe oçramadı äle.
XS
SM
MD
LG