Sarıtawda Tatar mädäniäte könnäre ütäçäk

Şul uq könnärdä, 21 marttan başlap, Sarıtauda Tatar mädäniäte könnäre ütäçäk. Ölkä milli-mädäni moxtariäte räise, eşquar Qamil Äbläzov häm başqa Sarıtau yağı tatarlarınıñ tırışlığı belän biredä konsertlar, milli kiçälär ütkärelä. Sarıtaulılarnıñ çaqıruı buyınça monda Kamal teatrı artistları gastrol'gä barırğa cıyına. Şul uq könnärdä Sarıtau tatar gimnaziäsendä tatar mäğärif oyışmalarınıñ, mäktäp-gimnaziäläreneñ citäkçeläre konferensiäse ütäçäk. Anda Rusiäneñ 20-läp töbägennän tatar gimnaziäläre direktorları kilergä tieş. Şulay uq martnıñ soñğı atnasında Sarıtau yanındağı Ükäk şähärçegendä, Altın Urdanıñ ber möhim qalası bulğan şuşı borınğı urında maxsus kürsätkeç-häykäl açılaçaq. Sarıtaudağı tatar mädäniäte könnären ütkärü ölkä administratsiäsennän dä, tatar avtonomiäsennän dä, başqa töbäklärdäge milli oyışmalardan da zur tırışlıq täläp itä. Xäzergä äzerlek eşläre bik kierenke bara dilär.