Rusiä, Ukraina, Moldova prezidentlarınıñ Odessa oçraşuında Miñtimer Şäymiev tä qatnaştı

Yäkşämbe könne Odessada Rusiä, Ukraina, Moldova prezidentları Vladimir Putin, Leonid Kuçma häm Vladimir Voronin şuşı 3 ilneñ iqtisadi xezmättäşlege turında söyläşülär alıp bardı. Bu öç ilne elekke SSSR turında xätirälär berläşterä disäñ, döres bulmas. Söyläşülärneñ töp teması – torbağa bäylängän bulıp çıqtı. Gaz cibärü häm neft' eşkärtü, energetika mäsälälärendä xezmättäşlek säyäsättän dä möhimräk. Rusiä delegatsiäsendä söyläşülärdä qatnaşırğa Tatarstan prezidentı Miñtimer Şäymiev häm “Tatneft'” berläşmäse citäkçese Şäfäğät Taxautdinov barğannar. Räsmi xäbärlärgä qarağanda, Tatarstan delegatsiäse Odessadan Qazanğa düşämbegä qarşı töngä maxsus oçqıç belän urap ta qaytqan. Düşämbe könne “Azatlıq” radiosınıñ Qazan bürosı Odessadağı söyläşülärdä Tatarstannıñ nindi pozitsiädä torğanlığın belergä tırıştı. Ämmä, Odessağa barğan mäğlümät üzäge xezmätkäre dä, başqa räsmi şäxeslär dä läm-mim. İqtisadi söyläşüdä qatnaştıq, didelär. Bu söyläşülär yabıq işek artında barğan ikän. Menä şunı ğına açıq itep äytä alabız.