Accessibility links

җомга, 9 декабрь 2016, Казан вакыты 12:52

300 Qazan militsionerı Çeçnyadan qayttı


Pänceşämbe kiç Qazan timer yul vokzalına yaqın kilergä mömkin tügel ide. Här çatta DAİ maşinaları, militsionerlar basıp tora ide. Berençe mälgä Qazanğa bik sallı, qaderle qunaq kilä axrısı, dip uylawçılar yalğıştı. Bu kiçtä Çeçnyadan çirattağı komandirovkanı tögälläp, 300 Qazan militsionerı isän-saw äylänep qayttı. Alarnı qarşı aluçı yaqınnarı da, räsmi keşelär dä xislären yäşermäde. Älege militsionerlar Gudermesqa ğınwar ayında kitkännär ide. Äytergä kiräk, 3 ay eçendä alar şaqtıy qatlawlı wäzğıättä bulsalar da, yuğaltularsız qayttı. Ä menä uzğan yıl axırında komandirovkada bulğan militsionerlar ike iptäşlären bötenläygä yuğalttılar, ä bişese yaralanıp qayttı.

Läkin xäzergä militsionerlarğa ciñel sularğa irtäräk äle. Suğışqa komandirovkalar däwam itäçäk. Yaqın arada Qazan garnizonınnan Çeçnyanıñ Şelkovskoy rayonına 100 militsioner cibäreläçäk. Bu yulı şomlı komandirovqa yartı yılğa suzılaçaq.

Näq menä şul yartı yıl uñayınnan Rusiäyneñ başqa töbäklärennän Çeçnyağa cibärelgän militsiä xezmätkärläre zur rizasızlıq belderä başladılar. Üzäk gazetalar xäbär itkänçä, aralarında xätta «Rusiä kaharmanı» isemen yörtüçelär dä bar ikän. Çeçnyadağı suğışta qatnaşuçılarğa aqça tüläw, qayber taşlamalar bulsa da, moral' yaqtan alar da nıq arıylar. Ğailälärennän ayırılıp toru, härkönne stress kiçerü, küräseñ, ciñel genä uzmıydır. Xäyer, älege suğıştan tuyu xärbilär arasında ğına tügel, ğadi keşelärdä dä şaqtıy sizelä. Qayber säyäsätçelär dä bu mäğnäsez suğışnı tänqitläp çığalar, anı tuqtatunı taläp itälär. Çönki Kavkazdağı konfliktnıñ oçı-qırıyı kürenmi. Dimäk, moral' yaqtan da, matdi yaqtan da suğış Rusiä xalqına bik qimmätkä töşä.
XS
SM
MD
LG