Accessibility links

Кайнар хәбәр

Qazanda Ğaliäskär Kamal teatrınıñ baş rejisserı Marsel Salimcanov häm Kaçalov isemendäge rus drama teatrı artistı Petr Betevnıñ cenazaları ütte


28 mart könne Tatarstan xalqı teatr sängäteneñ ike olpat şäxese belän xuşlaştı. 26 mart könne Xalıqara teatr köne aldınnan Mäskäw xästäxänäläreneñ bersendä Ğaliäskär Kamal teatrı rejisserı Marsel Salimcanov, ä Qazanda Kaçalov isemendäge teatrınıñ tanılğan artistı Petr Betev wafat buldı.

Marsel Salimcanov cenazası ul 40 yıl ğomeren bağışlağan Ğaliäskär Kamal isemendäge tatar däwlät akademiä teatrı binasında uzdı. Anı maxsus oyıştırılğan komissiä räise Färit Möxämmätşin açtı. Berençe bulıp xuşlaşu süzen Prezident Mintimer Şäymiev äytte. Ul märxümneñ distälägän yıllar barlıq küñelen, säläten bağışlap säyäsättän östen bulıp, tatar teatrına xezmät itüen häm tatar teatrı tarixında üze ber däwergä, çorğa äwerelüe turında söyläde.

Märxümneñ yaqın dustı yazuçı Tufan Miñnullin üzeneñ çığışında teatr, ädäbiät eşlekleläreneñ xäläten qawşap qalu dip bäyäläde. Irınbur rus drama teatrı rejisserı Räfkät İsrafilov xuşlaşu süzendä märxüm belän icadi xezmättäşlege, anıñ eçkersez yärdämçellege turında söyläde. Başqort akademiä drama teatrı wäkile Başqortostan citäkçelegeneñ, Başqortostan zıyalılarnıñ qayğı urtaqlaşuı turında citkerde. Ğaliäskär Kamal teatrınıñ Marsel Salimcanov qabızğan yoldızlarnıñ berse - Alsu Ğaynullina teatrınıñ märxüm citäklägän çorın altın çor dip atadı. Ul Marsel Salimcanovnıñ yäş şäkertlärenä iğtibarlı buluın, üsterüen, atalarça “menä bezneñ teatrıbıznıñ kiläçäge”, dip äytüen cılı itep iskä aldı.

Cenazada yomğaqlaw süzen märxümneñ ata-babaları tuğan-üskän Ätnä rayonı wäkile Fäyzi Ğaliev äytte. Şaqtıy qawşağan xalättä bulsa da, ul Marsel Salimcanovnıñ Şärif Xösäenovneñ “Äni kilde” spektaklendä tatar anası obrazın tudıruın, tatar teatrın böten dönyağa çığaruın, Tatarstannan çittä ğorurlıq belän “bez tatarlar, min tatar” dip äytüen iskä aldı. Cenazada Rusiä mädäniät ministrı Mixail Şvıdkoynıñ, Başqortostan Prezidentı Mortaza Räximovnıñ, Türksoy oyışmasınıñ, Finlandia tatar cämğıäteneñ qayğı urtaqlaşu telegrammaları uqıldı.

Marsel' Salimcanov cenazasınnan soñ xökümät, däwlät citäkçelre Kaçalov isemendäge teatrğa Rusiäneñ xalıq artistı Petr Betev belän xuşlaşırğa yunäldelär. Biredä Mintimer Şäymiev tağın ber tapqır bügenge könneñ Tatarstan xalqı öçen açı xuşlaşu könnäre buluın bilgeläp ütte. Märxümnärne saylanğan hönärlärenä tuğrılıq häm üzlären sänğätkä tulısınça bağışlawları berläşterä, dide ul. Marsel Xäkim ulı Salimcanov tatar ziratında Gabdulla Tuqay qabere belän yänäşä, ä Petr Pavloviç Betev Arça ziratında cirländelär.

Köndälek matbuğatta märxümnär Marsel Salimcanov häm Petr Betevneñ nekrologları bergä birelä. “Время и деньги” gazetasında bu şäxeslärneñ barlıq isemnären, däräcälären, büläklären sanap tormıyça, baş xäreftän Rejisser häm Artist kitep bardılar, dip kenä äytü dä citä, dielä.

Şulay da, Marsel Salimcanov wafatına qarata iñ moñsu, yöräkkä ütärlek süzlärne “Tatarstan yäşläre” gazetası yazdı. Sitata: “Yaz bar, millät bar, teatr bar, ä Marsel Salimcanov yuq. Soñgı 35 yıl eçendä tatar teatrınıñ üzägen, altın bağanasın täşkil itkän şäxes wafat. Ul çın mäğnäsendä teatrnıñ atası ide. Ğaliäskär Kamal, Kärim Tinçurin, Şiriäzdan Sarımsakov, Xakim Salimcanov, Rifqät Bikçantaev kebek şäxeslär rätenä küptän basqan rejisser ide ul. Anı maqtadılar da, premiälär dä birdelär, süktelär dä, ni äytsälär äyttelär, ämma zur talant iskitkeç osta oyıştıruçı, citäkçe ikänen beräw dä inqär itmäde häm itmiäçäk.”
XS
SM
MD
LG