Accessibility links

сишәмбе, 6 декабрь 2016, Казан вакыты 11:14

29 martta Däwlät Şurası Tatarstan Konstitutsiäsenä 400 täqdim tikşeräçäk


29 martta Däwlät Şurası Tatarstan Konstitutsiäsenä 400 täqdim tikşeräçäk

28 mart könne Tatarstan Däwlät Şurasınıñ matbuğat üzäge mäğlümät çaralarına elektron poçta aşa 90 bittän torğan ber dokument tarattı. Bu 27 martta Däwlät Şurası prezidiumı utırışında tikşerelgän häm täğäyenlängän Tatarstan Konstitutsiäsenä östämälär häm üzgäreşlär turında qanun proektına kertelergä tieşle täqdimnär. Tatarstan parlamentına kilgän 1242 täqdimneñ komissiälärdä tikşerelgännän soñ 400 artığı tablitsa räweşendä tözelgän. 29 martta Däwlät Şurasınıñ 11 plenar sessiäsendä bu tablitsa deputatlarğa täqdim iteläçäk. Däwlät Şurasınıñ prezidium utırışında räis Färit Möxämmätşin bu täqdimnärne tikşerü, kim digändä, ike köngä suzılaçaq, dide. Şulay itep, plenar utırış comğa häm şimbä könnärne baraçaq. Häm annarı soñ berniqadär tänäfestän soñ däwam itelergä mömkin. Färit Möxämmätşinnıñ Tatarstan televideniesendä häm radiosında turı efirda çığışı küpçelek tatarstanlılarnıñ Tatarstan Konstitutsiäsenä üzgäreşlär kertü protsessına bitaraf tügellegen kürsätte. Tatarstan hönärçelär berlege bu mäsälägä maxsus matbuğat oçraşuı bağışladı häm hönärçelär berlegeneñ zakon çığaru initsiativası xoquqı töşerep qaldırılu belän kileşmiäçägen belderde.

Milli-ictimağıy oyışmalar haman da Konstitutsiäne üzgärtmäw pozitsiäsendä qalalar. 28 mart könne elektron mäğlümat çaralarıda Qazanda milli-ictimağıy oyışmalarnıñ Xalıq cıyını ütkärüläre turında xäbär itelde. Cıyınğa Tatarstan möstäqillege turında xalıq referendumınıñ 10 yıllığı häm Konstitutsiägä üzgäreşlär kertü temaları çığarıla.
XS
SM
MD
LG