Accessibility links

дүшәмбе, 5 декабрь 2016, Казан вакыты 15:40

Däwlät Şurası Tatarstan Konstitutsiäneñ yaña redaksiäsen tikşerä


Comğa könne Qazada Tatarstan Däwlät Şurası sessiäse üzeneñ eşen başlap cibärde. Bu yulı deputatlar bik zur wä möhim mäsäläne qarıy. Tatarstan Konstitutsiäseneñ yaña proektına 500 dän artıq tözätmä häm östämälärne tikşerep çığar öçen parlament komissiäse räise Vasiliy Loginov fikerençä, kimendä 4 kön kiräk bulaçaq.

Konstitutsiä proektı belän tanışu öçen küp waqıt birelmäsä dä, cämäğät oyışmaları, milli xäräkät wäkilläre, räsmi dairälär häm qayber ğadi keşelär töp qanunğa üzläreneñ mönäsäbäten belderdelär. Qayberäwlären sezneñ fäqıregez comğa könne irtän İrek mäydanında üz küzläre belän kürep qayttı. Lenin häykäle yanında qızıl bayraqlar kütärgän kommunistlar häm çittäräk LDPR wäkilläre basqan bulsa, parlament binası qarşında şiğärlär totqan milli xäräkät wäkilläre urın alğannar ide. Piketçılar texnik yaqtan da qorallanğan ide. Tawışnı köçäytkeç caylanma aşa alar mäydanğa kilgän maşinalarnı, annan çıqqan qayber keşelärne kommentarlar belän qarşı aldı. Yöze küplärgä tanış, zamanında mäğärif ministrı bulıp eşlägän ber akademiknı kürgäç, piketçılar anıñ latinğa qarşı çığuın iskä alıp, “niçek bu keşe bezneñ cirdä yöri?!”, dip qıçqırdılar. Tatarstan Däwlät televideniese maşinası kilep tuqtağaç ta, piketta toruçılar TV eşenä rizasızlıq belderdelär.

Mäydanğa zatlı inomarkalar abruylı deputatlarnı taşıy tordı. Ä mikrofonnan tuğanğa yararmı-yuqmını uylap tormıyça millätpärwärlär xalıq aqçasın äräm-şäräm itügä qarşı fikerlär äyttelär. Ul arada oppozitsion xäräkätlär, säyäsi firqalärne berläştergän «Tügäräk östäl» wäkilläre «Konstitutsiä — xalıq öçen» digän belderü tarattılar. Älege dokumentta xaqimiät Konstitutsiäneñ yaña redaksiäsen xalıqtan yäşeren räweştä äzerläde häm şuña da anda elekkege kimçeleklär saqlanğan, bu töp zakonnı çın patriotlar häm demokratlar tarafınnan qabul itelmäslek xälgä kiterde dielä «tügäräk östäl» belderüendä. Oppozitsiä wäkilläre xökümät Däwlät Sovetı tarafınnan bilgelänergä, Konstitutsiädä saylaw sistemasın kürsätergä, 50 % deputatlar firqalärdän, 50 % bermandatlı okruglardan saylanırğa timi digän öndämälär dä bar.

Äytergä kiräk, İrek mäydanına çıqqan piketçılar plakatlarında Konstitutsiägä qağılmağan başqa temalarda kürsätelgän ide. Mäsälän, «Tatarstanda atom stansiäsen tözetmäskä!», «Suverenitet klanğa tügel — xalıqqa!» digän şiğar'lär küzgä taşlandı. Ğali üz eşendä, Wäli üz eşendä digändäy, parlament zalında xalıq deputları üzläreneken suqaladılar.
XS
SM
MD
LG