Accessibility links

шимбә, 10 декабрь 2016, Казан вакыты 09:57

“Liberal' Rusiä” qorıltayında Tatarstan delegatsiäse qatnaştı


“Liberal' Rusiä” qorıltayında Tatarstan delegatsiäse qatnaştı

Uzğan yäkşämbedä Mäskäwdän Mars Şämsetdinov, Damir İsxakov häm tağın ike keşe Boris Berezovskiy oyıştırğan “Либеральная Россия” xäräkäteneñ qorıltayında bulıp qayttılar. Bu qorıltay Mäskäwneñ şaqtıy qimmätle häm zatlı “Kosmos” kunakxanäsendä ütkän. Monda ber bülmäneñ dä qunıp çığu bäyäse 240 dollar, dilär. “Liberal' Rusiä” xäräkäte şul isemdäge partiä tözergä qarar itkän. Delegatlar qarşında Boris Berezovskiy da Londonnan İnternet aşa çığış yasağan. Qorıltayda qatnaşuçılarğa Berezovskiy tarafınnan oyıştırılğan mäğlüm film kassetaları taratılğan. Bu filmda Mäskäwdäge şartlatularnı maxsus oyışmalar yasadı, digän ğayepläw taşlana.

Ä milli respublikalar, säyäsi xäräkätlär Berezovskiy firqasenä niçek qarıy soñ? Xalıq oligarxlarnı yaratmasa da, Rusiäneñ xäzerge säyäsäten, bigräk tä avtoritar rejim qorunı xup kürmi. Üzeneñ İnternet aşa yasağan dokladında Boris Berezovskiy Rusiädäge xäzerge wäzğiätkä tänqit yasağan. Ägärdä Rusiä Belorussiä belän quşıla ikän, Tatarstan kebek respublikalrnıñ statusı ni öçen Belorussiänekennän tübänräk bulırğa tieş, dip äytkän Boris Berezovskiy. Ul Mintimer Şäymievneñ 1-2 yıl elek bu turıda yasağan belderüen yaqlap çıqqan. Berezovskiy täcribäle säyäsätçe, ul Rusiä xaqimiäteneñ yomşaq urınnarın belä. Bügen iñ yomşaq urın federal' üzäkneñ töbäklärne, respublikalarnı xoquqsız qaldıru. Delegatlar Boris Berezovskiydan üzläreneñ iminlegenä qurqınıç yanaw mömkinlege turında soraw birgännär. “Liberal' Rusiä” xäräkäte ägzaları öçen yärdäm fondı buldıru, bälägä, qısımğa duçar buluçılarga xoquqıy yärdäm oyıştırılaçaq ikän. Berniçä atnadan “Liberal' Rusiä”neñ Tatarstan oyışması üzeneñ konferensiäsen ütkäräçäk. Mars Şämsetdinov citäklägän şuşı töbäk oyışması Çuykov uramında üzeneñ ştab-kvartirasın açqan. Demokratiä öçen köräşneñ menä şundıy qatlawlı yullar belän baruı berençe tapqır ğına tügel. Tatarlar üzlären teräk, yärdäm ezläp, Berezovskiyğa tayana ikän, monıñ obyektiv säbäpläre bar.
XS
SM
MD
LG