Tatarstan “suveren” tügel, ä “sotsial” däwlät bulaçaq

Sişämbe könne Tatarstan Däwlät Şurasınıñ 11. Plenar sessiäse däwam itterelde. Mäğlüm ki, sessiäneñ xälitkeç mizgele inde ütep kitte. Yaña Konstitutsiäneñ berençe maddäsendä “suveren däwlät” digän süzlär “sotsial' däwlät” digän töşençä belän alıştırıldı häm Tatarstan Rusiä Federatsiäseneñ tulı xoquqlı subyektı dip täqrarlandı. İnde möstäqillek, däwlätçelek öçen köräşüçe deputatlar da, tatar cämäğätçelege dä “bulası buldı, xäzer inde Konstitutsiäneñ yaña redaksiäseneñ başqa maddälärenä tözätmälär häm östämälär kertü caylı ğına barır, barısı da Mäskäw quşqança bulır, dip berniqadär tınıçlanıp qalğanday buldı. Süz uñayınnan, şundıy millätpärwar deputatlarnıñ berse Tufan Miñnullin uzğan utırışta “namussız sudya bulğançı namuslı cinäyätçe buluıñ yaxşıraq”, dip soñğı tapqır deputatlarğa 1.maddäne qabul itmi torırğa täqdim itkännän soñ qan basımı kütärelep, xastaxanägä eläkkän.