Accessibility links

дүшәмбе, 5 декабрь 2016, Казан вакыты 11:36

Yaña Konstitutsiä -- “Ştanin Konstitutsiäse” bulaçaqmı?


Yaña Konstitutsiä -- “Ştanin Konstitutsiäse” bulaçaqmı?

Çınnan da, xalıqta yaña Konstitutsiä “Ştanin Konstitutsiäse” digän fiker nığaya bara. Sişämbe könge utırışta da Aleksandr Ştanin tözätmälär häm östämälär tikşergändä, mikrofon yanındağı daimi opponent rolen başqardı. Här tözätmädä, här östämädä ul federal' qanunnarnı qayğırta sıman. Asılda ul säyäsi wäzğıättän faydalanıp, ayaq teräp, respublika qanunnarına reviziä yasıy. Häm küpçelek monıñ belän kileşergä mäcbür, çönki “Tatarstan yäşläre” gazetasınıñ soñğı sanında yazılğança, “Tatarstan citäkçlege ike ut arasında häm taşlamalar yasıy-yasıy, çigenä bara, niçek bulsa da isän qalırğa kiräk.” Älege yullar häm “Ştansız Konstitutsiä” digän mäqälä avtorı Riman Ğilemxanov uzğan atna azağındağı sessiä utırışı barışında Prezident Mintimer Şäymievneñ yaña redaksiädäge töp üzgäreşlär – Preambula häm berençe maddägä üzgäreşlärgä qarata - fikeren belgän. Ul bolay yaza. Mintimer äfände sessiädä äytkän fikeren tağın qüätläde. Berençe maddäne qabul itmi torıp, Rusiä belän ike aradağı şartnamä turında yaña söyläşülär başlap bulmayaçaq.

“Ägär Mäskäw şartnamädän ğomumän baş tartsa?” digän sorawğa prezident – “Monıñ öçen iñ elek Rusiä Konstitutsiäsen üzgärtergä kiräk”, dide häm moña nindider mäğnä saldı, kebek. Şulay itep, Tatarstan parlamentı äle Konstitutsiäneñ yaña redaksiäseneñ başqa maddäläre öçen köräşäçäk, tartqalaşaçaq.

Sişämbe könne tikşerelgän östämälär, tözätmälär öçen bil alışu bardı. Töp opponent şul uq Aleksandr Ştanin buldı. Tatarstan Konstitutsiäseneñ yaña redaksiäsendä prezidentlıqqa qağılışlı maddälärne tikşergändä, Aleksandr Ştanin ikençe däwlät tele, tatar telen belü şartına qarşı çıqtı. Ämmä, yaña redaksiädä “Tatarstan Prezidentı ike däwlät telen dä belergä tieş häm Prezident Antı ike däwlät telendä dä yañğırarğa tieş” bulıp qaldı. Sişämbe utırışında şulay uq Prezidentnıñ ike möddätkä genä saylanuı turında tözätmä qabul itelde.
XS
SM
MD
LG