Accessibility links

дүшәмбе, 5 декабрь 2016, Казан вакыты 15:29

Tatarstannıñ yaña Konstitutsiäse qabul itelmäs borın tänqitlänä başladı


Tatarstannıñ yaña Konstitutsiäse qabul itelmäs borın tänqitlänä başladı

Tatarstan parlamentı çirattağı sessiäsen yabarğa ölgermäde, ikençe uqılışta qabul itelgän Konstitutsiäneñ yaña redaksiäsenä törle yaqtan tänqit uqları yawa başladı. 4 aprildä «Коммерсант» gazetası «Татарская Конституция признана неконституционной» digän mäqälä bastırdı. Süz yaña redaksiädä saqlanıp qalğan häm şuña da Mäskäw, İdelbuyı federal' okruğı, Tatarstan prokurorı tarafınnan tänqitlängän maddälär turında bara. Oşbu uñaydan icat itelgän öç dokument uzğan şimbädä Tatarstan deputatları arasında taratılğan ide. Konstitutsiäneñ yaña redaksiäsenä qarata çığarılğan älege yuridik bäyälämälärne küzdän kiçergändä, federal' üzäkne qanäğätländermägän 13 tezisnı küräseñ.

«Восточный экспресс» gazetasınıñ comğa sanında alar xaqında täfsilläbräk äytelgän. Anda suverenitet dip atalğan häm şul töşençägä işarä yasalğan maddällär federal' Konstitutsiägä qarşı kilä, dip äytelä. Şulay uq respublikanıñ xalıqara mönäsäbätlärdä qatnaşuı, üzeneñ tabiğat baylıqlarına iä buluı, Prezidentnıñ tatar häm urıs tellären belergä tieşlege dä şik astına quyıla. Älege dokumentlardan kürengänçä, kiläçäktä Ministrlar Kabinetın Prezident üze citäklärgä tieş ikän. Qısqası, ikençe uqılış belän öçençe uqılış arasında deputatlarğa, parlament başlıqlarına şaqtıy sikeltäle yul uzası bula. Näq şul arada, yäğni 29 aprilgä xätle Mäskäw belän yä komprmiss tabarğa, yä respublika Konstitutsiäsen Ştanin kürsätmäläre nigezendä tulısınça Rusiäneke belän täñgälläşterergä turı kiläçäk.

Bälkem, Tatarstan citäkçelegeneñ zapasta başqa variantlar da bardır. Monısın älegä äytü qıyın. Läkin bernärsä açıq: tırışıp-tırmaşıp, köräşep, bäxäsläşep saqlap qalğan citdi mäddälärgä yañadan äylänep qaytırğa turı kiläçäk. «Восточный экспресс» jurnalistı fikerençä, deputatlar upqınğa ber adım qala tuqtadılar.

Atna buyına Konstitutsiä teması säyäsätçelärneñ iğtibar üzägendä buldı. Alarnı baytaq işettek. Ä menä başqa keşelär bu xaqta niçegeräk uylıy ikän. Mäsälän, yazuçı-satirik Fänzaman Battal. Äle genä anıñ «Soñarğan yaz» digän şiğerlär häm poemalar cıyıntığı dönya kürde. Matur rozalarnı xäterlätkän lirik şiğerlär çäneçkele satirik poemalarnı uqığaç, usal telle Fänzamannıñ inde berniçä yıl elek bügenge säyäsi wäzğiätne quzallawına iğtibar itäseñ. Fänzaman Battal Konstitutsiäneñ yaña redaksiäsen tänqitläp, parlament andıy Konstitutsiäne bötenläy qabul itärgä tieş tügel, dip sanıy.
XS
SM
MD
LG