Accessibility links

сишәмбе, 6 декабрь 2016, Казан вакыты 11:18

İkençe yartıyıllıqqa gazeta-jurnallarğa yazılu bäyäse arta


İkençe yartıyıllıqqa gazeta-jurnallarğa yazılu bäyäse arta

Pänceşämbe könne Prezidentnı Matbuğat yortında da kötälär ide. Härxäldä, şuşı könnärdä üzeneñ 85 yıllığın bilgeläp ütüçe “Республика Татарстан” gazetası redaksiäse urnaşqan qatta tärtip salu, çistartu, buyaw-ağartu eşläre iñ yuğarı noqtasına citkän ide. Prezident belän oçraşunı bu gazeta redaksiäse genä tügel, ğomumän, barlıq köndälek, atnalıq basmalar wäkilläre dä tüzemsezlek belän kötälär. Çönki şuşı arada, bigräk tä gazetalar aldına tağın “yäşäw, yä ülem” mäsäläse quyıldı. Elemtä ministrlığınıñ poçta xezmäte gazetalarnı taratu bäyäseneñ ikençe yartıyıllıqqa tağın 40% artaçağı turında iğlan itte. Tatarstanda gazetalarğa yazılu bäyäläreneñ 60% poçta xezmäte, yäğni taratu bäyäse täşkil itä ikän. Rusiädä bu kürsätkeç 30% qına.

Şuşı arada Mäskäwdä mäğlümat çaraları turında zakonğa üzgäreşlär kertü turında süz quzğaldı. Rusiä Prezidentı şuşı temağa söylägändä, süz irege, hiçşiksez, saqlanıp qalırğa tieş, bäysez mäğlümat çaraları bulsın, läkin alar nindider oligarxlarga bäyle bulırğa tieş tügel, dide. Tatarstan ğazetaçıları moña östäp, “elemtä ministrlığı häm anıñ “Tatarstan poçtası” kebek monopolistlardan bäysez ük bulmasalar da, yazmışları, yäşäw-ülem mäsäläse alarğa gına bäyle bulırğa tieş tügel” dip sanıy. Üze eşläp tapqanğa ğına yäşäw yulın saylağan häm tatar gazetaları arasında bäysezlekneñ berniqadär bilgese, simvolı bula alğan “Tatarstan yäşläre” gazetası möxärrire İsmäğil Şäräfiev kilep tuğan wäzğıätne bolay bäyäli:

Gazeta-jurnallarnıñ häm “Tatarstan poçtası”nıñ çığımnarnı keremnär qaplarğa tieş digäne döreslekkä turı kilsä dä, annan abunäçelärgä ciñel tügel. Bu, hiçşiksez, abunäçelärneñ kimüenä kiteräçäk. Dimäk, berniqadär mäğlümat möxiten qısrıqlıy. Gazeatçılarınıñ “bäyälär arttırunı dälillägez” digän taläbenä elemtä monopolistları “niçek teläsäk, şulay eşlibez” dip cawap birä.

Şulay itep, älegä respublikada matbuğat irege, anıñ basma öleşe elemtä ministrlığı qulında. Respublikada antimonopol' komitet ta bar, yuğisä. Läkin ul nigäder elemtä ministrlığınıñ teläsäni qılanuına küz yomıp kilä. Härxäldä, telefon elemtäse öçen beryulı abonent tüläwe dä, minutlap tüläw dä kertügä qarşı tora almadı.
XS
SM
MD
LG