Accessibility links

пәнҗешәмбе, 8 декабрь 2016, Казан вакыты 08:58

Keräşen tatarları citäkçeläre xalıq sanın alu waqıtında üzlären ayırım millät itep kürsätmäskä kileşte


Keräşen tatarları citäkçeläre xalıq sanın alu waqıtında üzlären ayırım millät itep kürsätmäskä kileşte

Pänceşämbedä Tatarstan Respublikası statistika komitetı citäkçeläre şul turıda iskärtep, üzläre başqarğan eşlär xaqında isäp-xisap tottılar. Älege komitet räise Valeriy Kandilov süzlärenä qarağanda, 2002 yılnıñ 9-16 üktäbrendä uzaçaq bu çara 15 meñ keşe xisapçı bularaq qatnaşaçaq. Yäğni, ber xisapçı şähärdä 425 keşe belän äñgämä ütkärep, anketalar tutıraçaq, awılda bu san 320 täşkil itäçäk. Keşelärneñ milli, sotsial' portretın açıqlaw öçen anketalarda 16, qayber oçraqlarda xätta 25 soraw bulaçaq.

Soñğı yıllarda demokratik şartlarda yäşäwlärenä qaramastan, keşelär fatirların cide qat yozaq astına biklilär, çit keşelärgä işek açarğa telämilär. Çönki işekkä şaquçılar üzlären yä tabib, yä militsioner, yä tağın ällä nindi hönär iäläre dip atıylar. Näticädä berqatlılar şularnı fatirlarına kertälär häm yış qına mal-mölkätennän qolaq qağalar. Dimäk, san aluçılarnı da qayber keşelär “ni brat, ni svat”, dip fatirğa kertmäskä dä mömkin. Andıy ışanmawçılar öçen uñaylıq qaralğan: anketalarğa cawapnı maxsus telefon aşa birergä bula.

Temağa yalğap, tağın şunısın äytergä kiräk, kiñ tatar cämäğätçelegen borçığan keräşennär mäsäläsenä dä pänceşämbe könne açıqlıq kertelde. Prezident Mintimer Şäymiev belän oçraşqannan soñ, keräşen tatarları liderları xalıq sanın alğanda üzlären ayırım millät itep kürsätmäskä, ä elekkeçä, tatar milläte eçendäge törkem dip yazılırğa kileştelär. Keräşen tatarlarınıñ isäben beler öçen san alğanda maxsus kod quyılaçaq. Oşbu kompromissnıñ ähämiäte ike yaq öçen dä bik zur. Qazan Kremlendäge añlaşu nigezendä keräşennärneñ moñarçı citärlek iğtibar itelmi kilgän problemaların räsmi dairälär çişärgä wäğdä birde.
XS
SM
MD
LG