Accessibility links

Qazanda Bötentatar İctimağıy Üzägeneñ qorıltayı ütte


Qazanda Bötentatar İctimağıy Üzägeneñ qorıltayı ütte

15 april könne Qazanda Bötentatar İctimağıy Üzägeneñ qorıltayı bulıp ütte. Qorıltayda qatnaşuçılar üzlären Qazan, Çallı, Alabuğa şähärläre häm Başqortostan, Omskiy kebek Rusia töbäkläre wäkilläre itep tanıttı. 700-dän artıq urını bulğan G.Kamal teatrnıñ zalı tulı ide. Anda utıruçılar arasında törle töbäklärdän cıyılğan milli xäräkät wäkilläre, Tarix institı ğalimnäre, tatar zıyalıları, mögälimnär, deputatlardan - Räzil Wäliev, xökümättän – milli bülek citäkçese Kim Miñnullin, Mäskäw qunığı - Äğdäs Borxanov kürende. Qorıltaynıñ eşen Räşit Yağfärov şundıy süzlär belän açıp cibärde:

Möhtäräm cämäğät, tatar ictimagiy uzägeneñ 3 yıldan soñ menä mondiy xälgä kilep, yañadan xalıq xörmät itä alırlıq xälgä kilep, şundıy qorıltaylarnı cıya alırlıq xälgä kilep, yañadan eşli başlawıbız belän, monda cıyıla aluıbız belän qotlıym.

Qorıltay tatar telendä alıp barıldı, biredäge fiker-aluşılarnı, ä çığa-kürsä talaş-ızğışlırnı da küzätergä kilgän jurnalistlar, ğadi qızıqsınuçılar - oyıştıruçlıarğa “qorıltay tatarça ğına baraçaqmı?” dip töpçenep yörde. Älege çara başlanır aldınnan, ber-niçä delegat belän äñgämä qordım, alarnıñ uy-fikerläre belän qızıqsındım.

Awıl xucalıgı akademiäse möğällime: Monda yañğırağan äyberlär miña yaqın... milli xäräkättä ozaq waqıt qatnaşıp kiläm. Soñşı arada milli xäräkät sülpänlänep kitte. Yäşlär cälep itelmi başladı. Bu qorıltaynıñ näticäse... anda qararlar qabul iteler, ämmä däwlät oyışmaları alarnı tanır mikän? Min moña bik ışanıp betmim.

Atkazanğan uqıtuçı, pedagogia uçileşesı direktorı: Min bu oyışmalarda әğzä bulıp tormıym, şuña kürä alarnıñ eşenä bäyä birä almym. Monda tatar xalqına xas äyber – talaş-ızgış kiterep çıgaru tırışlaqları kürenä, bu qorıltaynıñ kön tärtibennän dä sizelep tora. Min, yäşlär belän eşli torğan keşe bularaq, şını äytä alam – yäşlärne bu milli mäsälälärne xäl itüdän çitläşterü, döres tügel. Bez üzebezneñ uqu yortıbızdan 20 keşene delegat itep cibärdek.

Humanitar insitut talibäse: Bügen tatar xalqınnıñ yazmışı xäl itelä. Bu Rusiäneñ säyäsäte belän bäyle. Üzebezneñ fikerebezne belderer öçen monda kildek. Mömkin bulsa yärdäm iterbez.

B.T.: Ägärdä, milli xäräkät citäkçeläre, äydägez, xoquqlarnı uramnarga çıgıp dawlıybız, dip çaqırsalar, sez alarnıñ süzen tıñlar idegezme?

Humanitar insitut talibäse: Xiçşiksez, çığar idem. Min alarnı küptännän beläm. Yıl sayın Xäter könen ütkärüdä qatnaşam häm alğa taba da qatnaşaçaqmın. Yäşlär arasında minem kebek uylawçılar küp.

Qorıltay başında, Räşit Yağfärov üzeneñ räislek itü çorında ictimağıy üzäkneñ qılğan eşlärenä xisap tottı. 11 miting, Xäter könnәren ütkärdek, pozitsiäbezne daimi räweştä belderep kildek, dip söyläde ul anda . Räşit Yağfärov şulay uq, Bötendönya tatar kongressına da şeltäle süzlär äytte. Aralarnı yaqınaytıp bulmadı, digän belderü yasadı.

Cıyında qatnaşuçılarğa tatar ictimağıy üzäge eşçänlegeneñ töp yünäleşläre, milli respublikalarnıñ İdel-Ural isemle regional' konfederatsiägä berläşü, xalıq sanın alu xaqında, möselman-törki xalıqlarnıñ berdämlege turında, tatar xalqın tuplawda milli mäğlümat çaralarınıñ role häm tatar köräşen üsterü kebek temalarğa bağışlanğan, barlığı 11 rezolutsiä häm 3 möräcäğät proektları taratıldı.

Soñğı mäğlümätlärgä qarağanda şuşı eş qäğäzläre barısı da nigezdä qabul itelde. Çığışlar, qotlawlar ozaqqa suzılu säbäple, älege qararlar centekläp tikşerelmägän bulsa da...Töştän soñ qorıltay Kamal teatrınıñ zur zalınnan, keçesenä küçep, eşen däwam itkän. Şunda uq böten tatar ictimağıy üzägeneñ yaña citäkçelege dä saylanırğa tieş ide. Bu xäbärne efirğa äzerlägän waqıtta, anıñ näticäläre ale bilgele bulmadı. Bezneñ xäbärçe qorıltay barışın küzätep bardı, anda yañğırağan çığışlar, qabul itelgän qararlar häm ictimağıy üzäkneñ yaña citäkçeläre turında tulıraq mäğlümätne sişämbe könne citkerer.
XS
SM
MD
LG