Tatarstanlılar Sankt-Peterburgta federalizmğa bağışlanğan konferensiädä qatnaşa

Tatarstan Däwlät Şurası räise Färit Möxämmätşin citäkçelegendä delegatsiä Sankt-Peterburg şähärendä. Tatarstanlılar anda 23-24 aprildä ütäçäk Rusiäneñ törle däräcädä xakimiätlär arasındağı wäqälätlärne tikşerügä bağışlanğan xalıqara konferensiädä qatnaşalar. Älege konferensiä Aurupa Şurası, Rusiä prezidentı administratsiäse, Rusiä Federal' cıyını tarafınnan oyıştırılğan. Anda däwlät xaqimiäteneñ federal' organnarı eşçänlege, Rusiä subyektlarınıñ xakimiät organnarı häm cirle üzidarä strukturaları arasında wäqälätlärne bülü kebek mäsälälär tikşerelä. Tatarstan delegatsiäsendä respublika premier-ministrınıñ berençe urınbasarı Ravil Moratov, Qazan şähäre merı Kamil İsxakov ta bar. Şunısın da äytep ütärgä kiräk, Färit Möxämmätşin Sankt-Peterburgta ütä torğan konferensiädä Tatarstan parlamentı citäkçese bularaq qına tügel, ä Aurupanıñ cirle häm töbäk xakimiätläre kongressında Rusiä delegatsiäse äğzası bularaq ta qatnaşa.