Accessibility links

чәршәмбе, 7 декабрь 2016, Казан вакыты 23:12

«Dulqın» radiosı nindi teldä söylär?


«Dulqın» radiosı nindi teldä söylär?

İnde xäbär itkänebezçä, küplär bik yaratıp tıñlağan tatar telendä genä eşläüçe «Dulqın» radiosın yaqın kiläçäktä zur üzgäreşlär kötä. Çönki küptän tügel genä Mäskäwdä bulıp ütkän konkursta «Dulqın» eşli torğan yışlıqnıñ xucaları almaşındı. Şuşı uñaydan radioda nindi üzgäreşlär bulır? Ul efirğa tatar telendä çığarmı, yäisä radio urıs telle genä bulırmı? Bu sorawlar tatarstanlılarnı ğına tügel, ä başqa töbäklärdäge millättäşlärebezne dä bik qızıqsındıra. Nik disäñ, «Dulqın» radiosın respublikada ğına tügel, ä İnternet aşa böten dönyada tıñlarğa mömkin ide. Qayber yıraqta yäşäwçe, tatar telendä aralaşırğa mömkinlege bulmağan millättäşlärebez öçen bu tuğan telen onıtmasqa, respublika yañalıqların belergä, tatar cırın, moñın işetergä berdän-ber mömkinçelek ide. Alda äytelgän sorawlarğa cawap alu öçen bez radionıñ yaña xucaları OAO «TVT» şirkätenä möräcäğät ittek. Anda bezgä menä nindi mäğlümätlär birdelär. «TVT»nıñ general' direktorı Sergey Gusev süzlärenä qarağanda, yaña radio «Panorama» dip atalaçaq häm anda tatar häm urıs tellärendä eş alıp barılaçaq ikän. «Panorama» asılda Qazan şähäre radiosı bulaçaq. Ä radionıñ tapşırular direktorı Boris Mazin bulaçaq radio turında menä närsälär söyläde:

Radio ike teldä dä söyliäçäk. Qazanda andıy ber radio bar inde — Bulğar FM häm ul şaqtıy uñışlı ğına eşläp kilä. «Dulqın»da xezmät itüçelärneñ eşçänlege bezneñ taraftan qaralaçaq häm yaña radionıñ konsepsiäsenä turı kilüçe xezmätkärlär, älbättä inde, anda eşläp qalaçaqlar.

Sezneñ radio «Dulqın»nıñ auditoriäsen saqlap qala alırmı, digän sorawğa Boris Mazin bolay dip cawap birde:

Bu bik qıyın soraw. «Dulqın»nıñ auditoriäse, minemçä, bik tar ide. Bez anı kiñäytergä, tıñlauçılarnıñ sanın arttırırğa cıyınabız.

Bezneñ äñgämädäşlärebez äytüençä, «Panorama» radiosın da «Dulqın»nı kebek ük İnternet aşa tıñlap bulaçaq. Bu xaqta provayderlar belän inde söyläşülär dä alıp barıla ikän. Läkin Tatarstannan çittä yäşäwçe millättäşlärebez öçen bu ike telle, Qazan tormışına häm qazanlılarğa bağışlanğan radio qızıqlı bulırmı, monısı äle soraw astında.
XS
SM
MD
LG