Accessibility links

якшәмбе, 11 декабрь 2016, Казан вакыты 16:49

Konstitutsiä qabul itelde, açıqlıq - kerdeme?


Konstitutsiä qabul itelde, açıqlıq - kerdeme?

Bu atnanı açıqlıq atnası dip atıysı kilä. Çönki töp säyäsi mäsälä — respublika Konstitutsiäseneñ yaña redaksiäse nihayät qabul itelde häm şuşı könnärdä prezident Şäymiev aña üzeneñ imzası belän soñğı noqtanı quyarğa tiyış. Läkin beraz tiränräk uylawçılar soñğı noqta dip äytergä aşıqmaslar kebek. Çönki töp qanunda häm tatar xalqınıñ mänfäğäten yaqlağan qayber maddälärgä barmaq belän yanawçılar da, qarmaq belän eläkterergä teläwçelär dä bar äle.

Küräseñ, şularnı istä totıp axrısı, Mintimer Şäymiev küptän tügel Mäskäwdä yuğarı däräcädäge oçraşulardan soñ «Tatarstan Rusiäneñ Konstitutsion qırına tulısınça kerde» dip belderde. Häm bu cömläne Rusiäneñ televizion kanalları qabat-qabat kürsätep nindider ber qänäğätlänü xise kiçerde kebek.

Soñraq, Qazanğa qaytqaç, Tatarstan prezidentı jurnalistlarğa qayber fikerlären açığıraq äytte. Mäsälän, «milli xäräkätneñ böten idealları tormışqa aşmadı häm aşırlıq ta tügel ide», - dide. Konstitutsiägä prinsipial' maddä bulıp kergän üzäk belän şartnamä tözü üze dä, prezident fikerençä, töp qanunğa turı kilep betmi.

Qısqası, Konstitutsiäneñ yaña redaksiäse zur kompromisslar cimeşe. Bik tiz üzgärüçän Rusiä cirlegendä ğasırlar buyına qağılmaslıq izge Konstitutsiä qabul itü ğamälgä aşmıy torğan xıyaldır ul. Xätta täñgälläşterüne ayaq teräp taläp itkän federal' üzäk tä Tatarstan kebek respublikanı qarmaqta totu öçen qayber maddälärneñ bötenläy ük turı kilmäwenä küz yomarğa da mömkin. Älbättä, waqıtlıça. Ä inde üzegezne artıq irken tota başlasağız, qoyrığığızğa basarbız, yänäse.
XS
SM
MD
LG