Tatarstan Ciñü bäyrämenä äzerlänä

9 may -- Ciñü bäyräme. Qayber bäyräm çaraları respublikada inde ütä dä başladı. Härber diärlek oyışma, şirqät üzläreneñ veterannarı belän oçraşular oyıştıra, büläklär tarata, alarnı qunaq östäle artında xörmätli. Radio-tedevideniedä suğış veterannarı, alarnıñ yazmışları, Böek watan suğışı turında küpsanlı tapşırular kürsätelä, gäcit-jurnallarda alarğa bağışlanğan yazmalar bastırıla. Ğömümän, Ciñü bäyrämenä Qazanda da, respublikanıñ başqa şähär-rayonnarında da törledän-törle çaralar bik küp qaralğan. İnde düşämbe könne ük Kamal teatrı aldında balalarnıñ qotlauları, konsertı belän başlanıp kitkän bäyräm sişämbe, çärşämbe könnärendä Qazannıñ törle muzeylarında, kinoteatrlarında, yal parklarında, mädäniät yortlarında häm üzäklärendä ütkärelgän konsertlar, mädäni tamaşalar, Böyek watan suğışı turındağı filmnar kürsätelüe belän däwam itte. 9 mayda isä qazanlılarnı tağın da bayraq programma kötä. İrtädän ük başlanıp kitäçäk çaralar arasında suğış vetetrannarı qatnaşlığında tantanalı miting, tınlı orkestrlar paradı, xärbi texnika kürgäzmäse, törle uyınnar, bäygelär, tamaşalar, sport yarışları, konsertlar bik küp bulaçaq. Xättä Qazansu yılğasında Ciñü kubogına köymälär yarışı da bulır dip kötelä. Kiçen isä qazanlılarnı tönge küñel açu programması häm bäyräm salyutı kötä. Bıyıl 57 märtäbä kükkä aşaçaq salyut muzıykal' bulaçaq ikän. Xäyer, inde ölkän yäştä bulğan Böek Watan suğışı veterannarı bu çaralarda ällä ni aktiv qatnaşa almaslar. Bu oçraqta alarnıñ bäyräm çaraların Tatarstan telekanalı aşa küzätergä mömkinçelekläre bar.