Kreml' östendä Tatarstan prezidentınıñ ştandartı cilferdi

Tatarstanda säyäsi tormış zamança, yäğni ber genä fiker häm ber genä tös tügel, ä iñ kimendä ike törle qaraş, ike törle fiker bar. Äytik, Tatarstan konstitutsiäsennän möstäqillek, däwlätçelek mäğnäsen birgän matdälär alıp taşlanıp, barlıq qanunnar da Rusiä zakonnarına täñgälläşterelde. Bolay bulğaç, respublika häm anıñ parlamentı, prezidentı nindi cepkä elägep tora, digän soraw tua. Ämmä, barıber konstitutsiädä Tatarstan däwläte, tatar milläteneñ üzbilgelänü xoquqı digän bik möhim töşençälär bar. Şunıñ östäwenä, respublika prezidentınıñ däräcäsen kürsätüçe yaña ğämällär eşlände. Xäzer inde Tatarstan prezidentınıñ qabul itü sarayın häm anıñ eş kabinetın maxsus prezident ştandartı bizäp tora. Bu ştandart yäşel, aq häm qızıl töstäge buylardan torğan turı poçmaqlı tuqıma. Tatarstan flagınıñ urtasına däwlät tuğrasınıñ tösle räseme, yäğni alğı ayağın öskä kütärgän aq bars räseme töşerelgän. Ştandartnıñ yan-yaqları altınsıman çuqlar belän bizälgän. Alämneñ totqasına prezidentnıñ tulı iseme häm bu wazıyfanı başqarğan yılların kürsätüçe altın belän yögertelgän yazma berketelgän. Prezident alışınğan waqıtta, älege yazma da üzgärteläçäk. Ştandartnıñ töp nösxäse Prezident kabinetında tora. Anıñ dublikatı Kreml' östendä cilferdi. Älege ştandart turındağı ukaznı Mintimer Şäymiev yalın tämamlap eşkä çıqqan könne imzaladı. Xäzer inde Tatarstan respublika tügel, Rusiädä Putinnan başqa prezident bula almıy, diüçelärneñ awızları tomalana.