Accessibility links

җомга, 9 декабрь 2016, Казан вакыты 20:35

Yerşov uramındağı faciğäneñ näticäläre yasala


Yerşov uramındağı faciğäneñ näticäläre yasala

Qazannıñ meñyıllığına äzerlek torğan sayın kiñräk qanat cäyä. Aqça citmäw säbäple metro tözeleşe tuqtala, digän xäbärlär çıqsa da, Sukonka bistäsendä metronıñ ikençe tonnele dä qazıldı. Rusiä Kremlendä Qazannıñ meñyıllığına äzerlek komissiäse utırışları däwam ütä häm bu komissiäne Putin citäkli. Qazannıñ güzällegenä, maturayuına böten dönyada şaqqatalar. Şul uq waqıtta, bu ölkädä dä plyuralizm tamır cäyä. Küp kenä Qazan uramnarında asfal't yullar iskerep, yarılıp, çoqırlanıp betkän. Ä 8 mayda Yerşov uramında 2 sanlı tözeleş trestı tulay torağınıñ tışqı diwarı häm etaj arasındağı idän-tüşämnäre cimerelep töşte. 1956 yılda tözelgän bu yortta ber tapqır da kapital' remont ütkärelmägän. “Stalinka” digän proekt buyınça tözelgän binanıñ idän-tüşämnäre ağaçtan yasalğan bulğan. Şuña kürä, ağaç çerep 5 qatta yäşäüçe keşelärneñ torağı tuzanğa äylände. Yelena Zolotıx isemle ber xatın häm 15 yäşlek İlsöyär Yunusova cimerek astında qalıp, häläk buldı. Xäzer bu binadan 353 keşe Mayakovskiy isemendäge mädäniät yortına küçerelde. Zolotıx häm Yunusova soñğı yulğa ozatılıp, cir quyınına salınğaç, qayber mäğlümät çaraları bu kümü yolasında şähär xaqimiäte çinovniklarınıñ qatnaşmawı turında äytte. Kaspiyski şartlawında häläk buluçılarnı iskä alıp ber minutlıq tınlıq urnaştırılsa da, Qazandağı fatir qazasınıñ qorbannarı şundıy uq töstä iskä alınmadı. Premyer-ministr Röstäm Miñnexanov Qazanda öy cimerelü turında kiñäşmä ütkärde häm cawaplı keşelär tieşle cäza alırlar, moxtaclarğa yardäm kürsäteläçäk, dide. Şulay itep, Qazannıñ bügengesen häm kiläçägen ber genä tös belän sürätläp bulmıy. İñ kimendä ike – aq häm qara buyawlar kiräk bulaçaq.
XS
SM
MD
LG