Accessibility links

шимбә, 10 декабрь 2016, Казан вакыты 21:30

İran İslam respublikasınıñ Mäskäwdäge ilçese Qazanda


İran İslam respublikasınıñ Mäskäwdäge ilçese Qazanda

Menä şundıy qanuni ştandart elengän häm ör yañadan tözekländerelgän, cihazlanğan prezident rezidensiäsendä sişämbe könne Mintimer Şäymiev İran İslam Respublikasınıñ Rusiädäge ğädättäntış häm tulı waqälätle ilçese Ğölämriza Şafeinı qabul itte. İran ilçese Tatarstanğa 3 könlek eşlekle säfär belän kilgän. Düşämbe könne ul Qazandağı Rusiä İslam universitetında bulıp, anıñ şäkertläre, möğällimnäre belän oçraşqannan soñ, xäzerge waqıtta dini fanatizm häm terrorizm säbäpläre arqasında islamğa xöcüm waqıtında möselman mäğärife bu negativ tendensiälärgä kirtä bulıp torırğa tieş, digän fiker äytte. Säwdä häm tışqı iqtisadi xezmättäşlek ministrı Xafiz Salixov belän räsmi söyläşülär waqıtında ul Tatarstanda citeşterelä torğan boralaqlar häm oçqıçlar belän qızıqsınuın belderde.

Läkin Tatnews.ru xäbär itüençä, İran ilçeseneñ eşlekle säfäreneñ töp maqsatı -- neft çığaru häm eşkärtü ölkäsendä xezmättäşlekne däwam itterü çaraların kürü. Bu ölkädä İran-Tatarstan mönäsäbätläre üseşen uzğan yıl respublikağa İran prezidentı Möxämmät Xattami vizitı canlandırıp cibärgän ide. Ul waqıtta İran prezidentı belän oçraşu näticälären kommentariäläp, Mintimer Şäymiev “İran bezneñ neft belän qızıqsına, çönki alarnıñ çığanaqları iskerde. Bez eşkärtü häm neft yatmaları çığarılışın arttıru ısulları ölkälärendä xezmättäşlek itäçäkbez”, dip beldergän ide.

İran ilçese säfärennän soñ Tatarstanğa Rusiäneñ iminlek şurası särqätibe Vladimir Ruşaylo häm Rusiä Däwlät Duması räise Gennadi Seleznevnıñ kilüe kötelä. Vladimir Ruşaylo vizitı maqsatları turında äle räsmi xäbärlärdä äytelmi. Gennadi Seleznevnıñ vizitı maqsatları turında uzğan xäbärlärdä söylädek inde. Ul federativ häm millätara mönäsäbätlärneñ qanuni nigezlämäsen kamilläşterügä bağışlanğan seminarda qatnaşa. Älbättä, däräcäle qunaqlarnı ştandartlı yalıq-yolıq itep torğan prezident rezidensiäsendä qabul itärlär.

Älege saraynı kürgäç, Duma räise närsä diär, ä menä küptän tügel Tatarstannan saylanğan ber usal telle deputat yaña Prezident sarayın kürgäç, xislären atı-yulı belän äytep birgän, di. Çönki andağı bülmälär irkenlege, bülmälär cihazları, zallar zinnätlelege äytep betergesez, di. Elek torğınlıq yıllarnıda Tatarstannıñ Yuğarı sovetı häm Ministrlar Kabinetı urnaşqan binada prezident häm anıñ kiñäşçeläre genä urnaşqan. Ministrlar Kabinetı, mäğlüm bulğança, başta obkomnıñ iske binasına küçkän ide. Ä küptän tügel ör yaña bina salıp, başqa çıqtı. Barı tik Däwlät Şurası ğına xäzergä obkomnıñ yaña binasında utırıp qaldı. Äye, bezneñ xalıq aqnı qaradan ayıra belä. Prezidentnıñ däwlät simvolı, däwlät teräge bulğanın häm anıñ rezidensiäse bulırğa tieşlegen añlıy. Läkin xalıq demokratik cämğıät tözegändä, çinovniklarnıñ, türälärneñ könläp tügel, säğätläp ürçüen häm alarnıñ başbaştaqlığın, çiktän aşqan qılanuların häm bigräk tä xalıq belän xakimiät arasında nindider aradaşçı bulıp, üzlärençä divar qorıp, şunda qapqa yasap, saqçı bulıp utıruların añlamıy.
XS
SM
MD
LG