Accessibility links

чәршәмбе, 7 декабрь 2016, Казан вакыты 17:26

Rusiäneñ Iminlek Şurası räise Vladimir Ruşaylo citäkçelegendä delegatsiä Qazanda İslam Universitetı belän tanıştı


Rusiäneñ Iminlek Şurası räise Vladimir Ruşaylo citäkçelegendä delegatsiä Qazanda İslam Universitetı belän tanıştı

Rusiä Federatsiäse Iminlek şurası särqätibe Vladimir Ruşaylo citäkçelegendä delegatsiä Qazanğa çärşämbe kiçendä kilep citte. Delegatsiädä Vladimir Ruşaylonıñ urınbasarı Nikolay Solov'yev, anıñ apparatı citäkçeläre häm yärdämçeläre bar. Tatarstanğa şulay uq Rusiä Federatsiäse ministrı Vladimir Zorin, Rusiä xökümäte wäkilläre häm İdelbuyı federal' okrugı wäkilläre Valentin Stepankov kildelär. Pänceşämbe könne delegatsiäne Tatastan prezidentı Mintimer Şäymiev qabul itte häm qısqa ğına matbuğat oçraşuı buldı. Vladimir Ruşaylo Tatarstanğa kilüneñ maqsatı itep İdelbuyı federal' okrugına kergän regionnarda cämäğät iminlege xäle belän tanışu, dip belderde.

Rusiä Iminlek şurası särqätiben tatar cämäğätçelege häm bigräk tä möselmannar Rusiä İslam universitetında köttelär. Mäğlüm ki, älege universitet Qazanda Tatarstan başlanğıçı belän oyıştırıldı. 2000 yılnıñ sentäbrendä litsenziä alındı. Läkin universitetnı oyıştıru, cihazlawnıñ matdi yaqların respublika häm İslam bankı kütärde. Şuña kürä Rusiä xaqimiäte wäkilenä İslam universitetın kürsätep häm anıñ Rusiäneke ikänen iskä töşerep, alda torğan problemalarnı kürsätü bik möhim ide. Vladimir Ruşayloğa İslam universitetında başta berençe qatta urnaşqan keçkenä genä näşriätne kürsättelär. Biredä keçkenä broşyuralar, bukletlar näşer itelä, ä töp şöğel -- borınğı dini kitaplarnı restavratsiäläü, yañartu. Rusiä delegatsiäsenä şulay uq älege cihazsız buş torğan computer klassların da kürsättelär. Annarı soñ keçkenä genä uqu bülmäsendä Vladimir Ruşaylo häm Tatarstan prezidentı Mintimer Şäymiev Tatarstandağı töp dini konfessiälär islam, pravoslavie, iudaizmnıñ dini başlıqları Ğosman İsxaqi, Anastasiy ataqay häm İtsxak Gorelik oçraşıp, qısqa ğına söyläşülär alıp bardılar. Kereş süzendä Ğosman xäzrät Tatarstanda törle konfessiälärneñ tatu yäşäwläreneñ böten Rusiädä unikal' küreneş buluın häm şuşı xälne saqlap qaluda dini mäğärifneñ totqan urınına tuqtaldı.
XS
SM
MD
LG