Accessibility links

Кайнар хәбәр

Azatlıq qunağı Qazannıñ qızlar gimnaziäsendä


Azatlıq qunağı Qazannıñ qızlar gimnaziäsendä

Mine küptän qızlar gimnaziäse qızıqsındıra ide. Äye, ir-yeget bularaq ta, jurnalist bularaq ta. Oçraqlı ber telefon şaltırawı älege niätemne ğamälgä aşırırğa yärdäm itte. Minem küptänge tanışım Azatlıq radiosınıñ Urta Aziä illäre redaksiäläre direktorı Charles Carlson Qazanğa kilgän ikän. Pänceşämbedä anı Qazan däwlät pedagogiä universitetınıñ çit tellär fakultetı ğalimnäre qultıqlap Tuqay uramında urnaşqan qızlar gimnaziäsenä alıp kilgännär. Şunda uqığan 10. sıynıf qızları aldında ingliz telendä çığış yasar öçen. Oşbu xäbärne citkergän dustıma räxmät äytep fäqiregez şunda yul tottı.

Ğäcäp xällär, baqsañ näq märkäbezdä şundıy itağätle, talantlı, täwfıqlı qız balalarnı tärbiäläp belem birüçe gimnaziä tırışa-tırmışa 10 yıl yäşäp kilä. Häm niçek kenä. Direktor İlhamiä xanım Temirkaeva üzeneñ süzen ozaq totmadı. Beräm-beräm minem yanğa uquçıların çaqıra tordı. Alsu Mingalimova 13 yäşlek şağirä, rässämçı, inde berençe kitabın bastırıp çağarğan. İkençe äñgämädäşem mine tağın da şaqqattırdı. Urıs millätennän bulğan 14 yäşlek qız bala tatar telendä çatnattırıp köyläp cibärde. Biredä barlıq fännär qızlar öçen maxsus programmalar nigezendä alıp barıla. Uquçılar tatar telen dä, rus telen dä, inglizçäne dä su kebek eçälär. Ä inde 9. sıynıftan soñ belem birü yuğarı uqu programmasına yaqınaytıla. Monı gimnaziägä Qazan pedagogika universitetı uqıtuçıları başqaralar.

Qısqası, bu güzäl belem utrawı turında ayırım ber tapşıruda täfsilläp söyläp bulır ide. Älbättä, zamana dulqınnarı da älege utrawnı çitlätep uzmıylar. Binanıñ iskelege häm keçkenä buluı cihazlarnıñ, äsbäplarnıñ citmäwe küzgä taşlana.

Damir Ğismetdin
XS
SM
MD
LG