Accessibility links

чәршәмбе, 7 декабрь 2016, Казан вакыты 11:43

Kama Alanında Tatar atom elektrostansiäse tözeleşe däwam ittereläçäk


Kama Alanında Tatar atom elektrostansiäse tözeleşe däwam ittereläçäk

Kama Alanı digän cirdä Tatar atom elektrostansiäse tözeleşe däwam ittereläçäk digän xäbär, iske awızdan yaña süz digändäy, üzenä kürä ber sensatsiä bulıp yañğıradı. Döres, älegä bu Kama Alanı bistäseneñ cirle üzidarä şurası qararı ğına. Çärşämbe könne şuşı cirle üzidarä xalıq cıyını ütkärde. Anda çığış yasağan barça xalıq bistäneñ iqtisadi-sotsial xäleneñ axırğı çikkä citkänen söyläde. Älege bistädä yäşäwçe 10 meñgä yaqın xezmätkä yaraqlı keşeneñ yartısınıñ ğına eşe bar. Häm bolar barısı da xatın-qızlar diärlek. Ä irlär barçası da eş ezläp çitkä çığıp kitälär. Ğailälär atasız yäşi. Biredä barlığı 16 meñnän artıq keşe yäşi. 80-nçe yıllar urtasında biredä tözeleş başlanğaç, alarğa şähärçä 9 qatlı yortlar salındı. Perestroyka yılları başlanğaç, häm bigräk tä Çernobıl haläkätennän soñ Tatarstanda atom stansiäse tözügä qarşı köçle xäräkät başlandı. Häm 1990 yılda şul waqıttağı Tatarstannıñ Yuğarı Sovetı Tatar atom elektrostansiäse tözeleşen tuqtatu turında qarar qabul itkän ide. Xäzer menä Tatarstan Däwlät Şurasına Kama Alanı cirle üzidaräse şurasınnan älege qararnı yuqqa çığaru turında täqdim bulır. Añlaşıla ki, mondıy zur tözeleş 5 meñgä yaqın keşegä eş urını buldıru öçen genä tözelmiäçäk. Şulay uq xalıqta saqlanıp qalğan Çernobıl sindromı, yäğni ekologik haläkättän qurqu belän dä isäpläşmäyäçäklär. Xökümätneñ energiä çığanaqların arttıruda mänfäğätläre bar, inde berniçä yıl Tübän Kama su saqlağıçınıñ bieklegen kütärü eşläre alıp barıla. Läkin ber tügel, ike atom elektrostansiäse tözep quysalar da, Tübän Kama su saqlağıçın ber metrğa tügel, 10 metrğa kütärsälär dä - energiä çığanaqları ikelätä, öçlätä artsa da, elektrenergiäneñ kWt/säğäte bäyäse ber sumğa bulsa da töşärme? Xalıqqa şunısı qızıq. Ä ğalimnär, geologlar, cämäğät oyışmaları tağın monnan 10-15 yıl elek dälillängän mäğlümatların qabatlıylar. Atom elektrostansiäse tözeleş urını döres saylanmağan. Anda cir ubılu häm cir teträw qurqınıçı bar. Atom stansiäse Tatarstannıñ awıl xucalığına zur zıyan kiteräçäk. Reaktordan 50-100 km radiusta radiatsiä fonı kütäreläçäk. Tatarstannın atomtöşkä qarşı cämğıäte iyün başında Qazanda Tatarstanda häm Başqortostanda atom stansiälären tözügä qarşı miting uzdırırğa cıyınuların belderdelär.
XS
SM
MD
LG