Tatarstanda “İdel Hac” digän Hac qılu programması buldırıla

Mäğlüm ki, Rusiä İminlek şurası särqatibe Vladimir Ruşaylo Tatarstanda bulıp, dini konfessiälär eşçänlege xäle belän tanışıp kitkännän soñ Tatarstandağı möselman oyışmaları eşçänlegenä mönäsäbät uñay yaqqa üzgärde. Menä şuşı İminlek saqlaw oyışmalarına yaqın bulğan ber mäğlümat üzägeneñ fikere. İminlek şurası särqatibe Ruşaylo äfände üzeneñ Qazanğa vizitı waqıtında Tatarstanda oyışıp kilgän İslam dini mäğärifen uñay bäyäläde. Moña qädär dini belem alırğa telägän yäşlär İslam fundamentalizmı östenlek itkän Yaqın Könçığış illärenä barırğa mäcbür idelär. Ä qayber Tatarstan yäşläre islamnı Kavkaz cäylegendä, Çeçnyadä öyränälär ide häm annan soñ çäçän suğışçıları törkemnären tulılandıra ide. İminlek şurası särqatibe Tatarstan diniä nazaräteneñ Hac qılu sistemasın üzgärtü niäten xupladı. Xäzer Hac qılu öçen yärdäm çit il sponsorlarınnan tügel, ä NASKO-Tatarstan iminlek tä'min itü kompaniäseneñ “İdel Hac” programması buyınça başqarılaçaq. Şuşı arada Diniä nazaräte yäşüsmerlär arasında dini belemne arttıru öçen tağın ber izge ğamäl başqardı. 5-17 yäşenä xätle balalar arasında Kör’änne döres itep uqu buyınça “Söembikä señelläre häm eneläre” digän bäyge ütkärde.