Accessibility links

сишәмбе, 6 декабрь 2016, Казан вакыты 22:53

Jurnalistlar turında qayğırtu


Jurnalistlar turında qayğırtu

Qazanda comğa könne bixisap säyäsi, mädäni çaralar ütä. Rudolf Nuriev isemendäge Xalıqara klassik balet festivale, Törki xalıqlar teatrlarınıñ “Näwrüz“ festivale, “Yıl citäkçese” digän bäygesenä yomğaq yasap, respublikanıñ iñ buldıqlı citäkçesen bilgeläp, anı büläkläw, h.b.

Törle illärdän, töbäklärdän cıyılğan qunaqlar, şul isäptän Başqortostan xökümäte urınbasarı Xäläf İşmoratov citäkçelegendäge delegatsiä kilü ğadi xalıqqa älläni sizelmäsä dä, citäkçe dairälärneñ yäşäw rejimın kierenkeläşterä. İrtänge yaqta säğät 10nan uq säyäsät, matbuğat häm fän belän şöğellänüçelär Däwlät Şurasınıñ keçe zalına cıyıldı. Anda jurnalistlarnı äzerläw, alarnıñ kvalifikatsiäsen kütärü häm sotsial yaqlaw temasına parlament tıñlawları buldı. Soñğı waqıtta Däwlät Şurasınıñ daimi komissiäläre ber-berse belän yarışıp, şaqtıy qaynar mäsälälär kütärep, cämäğätçelek wäkilläre belän tikşerälär. Rusiä Dumasına häm Tatarstan Däwlät Şursına saylaw yaqınlaşqanın sizepme, deputatlar kiñ rezonans ala torğan mäsälälärdä üzläreneñ xäbärdarlığın kürsätä. Jurnalistlarnı äzerläw häm bäxetle itü turındağı parlament tıñlawlarında komissiä räise Razil Wäliev, Qazan universitetınıñ jurnalistika fakultetı dekanı Wasil Ğarifullin, Jurnalistlar berlege citäkçese Rimma Ratnikova, Ministrlar Kabinetınıñ mäğlümat çaraları häm cämäğätçelek belän elemtälär bülege citäkçese Färit Şahiäxmätov, h.b. çığış yasadı.

Älbättä, bazar iqtisadı häm süz irege zamanında jurnalistlarnı uqıtu häm eşkä urnaştıru, alarnıñ könküreş problemaların xäl itü belän däwlät orğannarı ğına tügel, iñ berençe çiratta, redaksiälär häm alarnı oyıştıruçılar şöğellänä. Şulay da, parlament tıñlawlarında qatnaşqan vitse-premyer Zilä Wälieva deputatlarnıñ häm cämäğätçelek wäkilläreneñ küñelenä kilgän täqdimnärne onıtmasqa, mäğlümat çaraları sistemasın reformalağan waqıtta isäpkä alırğa wäğdä itte.
XS
SM
MD
LG