Accessibility links

пәнҗешәмбе, 8 декабрь 2016, Казан вакыты 19:21

Sıra bäyräme bulmadı


Sıra bäyräme bulmadı

Soñğı könnärdä Qazanda sıra bäyrämen uzdıru tiräsendä çın-çınlap dramatik köräş bardı. Mäydanda ber yaqtan «Qızıl şärıq» kompaniäsen härdaim yaqlap, aña atalarça yärdäm itep kilgän Kamil İsxakov häm anıñ komandası, ä ikençe yaqtan cämäğätçelek häm Tatarstan xökümäte köç sınaştılar. Bu bil alışu qazanlılarnıñ küz aldında bardı. Sıra bäyrämen Kreml divarları, Qol-Şärif mäçete yanıda Soñğı qınğıraw bäyräme belän ber köngä bilgelänüe kiñ cämäğätçelekne bik nıq borçıdı. Qısqası, böten tormışıbız belän xaqimiät itä torğan aqça, äxlaqqa, yäş buınnı tärbiä itügä qarşı çıqtı. Comğa könne dönya kürgän «Восточный экспресс» gazetası «Zur şeşägä tabınu» digän töple mäqäläsendä «bügen cämğıätneñ kapitalğa qarşı torırlıq mexanizmnarı yuq», dip yazdı.

Ni ğacäp, bu yulı alay bulmadı. Pänceşämbe kiç Qazan şähär xaqimiäte başlığı Kamil İsxakov “aq flag kütärde”. «25 mayda Sıra bäyräme bulmayaçaq», dide ul TV aşa qısqa ğına çığış yasap. Ekrannarda üzäk stadion qarşında uramdağı xäräkätne yabar öçen eşçelärneñ timer qorılmalarnı montajlawı kürenep tordı. Dimäk, bäyräm bula, läkin qayçan ikäne äle bilgesez. Älbättä, mondıy köräştä cämäğätçelekneñ ciñep çığuı ber yaqtan söyenderä, ä ikençe yaqtan uylandıra. Yarıy äle bu yulı mäğärif ministrlığı, xökümät citäkçeläre cämäğätçelekneñ tawışın işette häm ğadellekne yaqlap çıqtı. Ä bit başqaça bulsa, bez tormışqa yaña ğına ayaq basqan yäş buınnı sıra diñgezenä çumdırır idek. Ä annan yözep çığuları ay-hay çiten bit.

Damir Ğismetdin
XS
SM
MD
LG