Accessibility links

якшәмбе, 4 декабрь 2016, Казан вакыты 09:11

Tatarstan başqortlarınıñ qorıltayı


Tatarstan başqortlarınıñ qorıltayı

Şulay da, soñğı yal könnärendä iñ zur säyäsi ähämiätkä iä waqiğa – Tatarstan başqortlarınıñ qorıltayı. Kamal teatrı binasına Çallıdan, Tübän Kamadan, Qazannan 150-dän artıq başqort cıyıldı. Oyıştıru komitetı räise Robert Miñnullin qorıltaynı açıp, Qazan başqortları avtonomiäse räise Firdäwes Bäşirovağa süz birde. Şağirä häm cämäğät eşleklese Firdäwes Bäşirova Tatarstan başqortlarınıñ yaxşı şartlarda ğomer itüen söyläde, respublika prezidentına, xökümätenä başqortlarnıñ berençe respublika qorıltayın ütkärügä yärdäm itkän öçen räxmät belderde. Çınnan da, pasport buyınça tügel, ä tel häm näsel buyınça başqortlar Tatarstanda ällä ni küp bulmasa da, alar tırışlıqları, aktivlıqları belän ayırılıp tora. Bilgele, tanılğan şäxeslär arasında da alar küp kenä. Çallıda başqortlar kübräk yäşi, ämmä alar mäktäp açuğa ireşä almağannar. Ber yaqtan iğtibar, yärdäm citmäsä, ikençe yaqtan başqort balaların tuplap mäktäpkä ğariza birü dä oyıştırılmağan. Qorıltayda Çallı başqortları avtonomiäse citäkçese Fäniä Şäripova, Tübän Kama başqortları avtonomiäse citäkçese Ğäli Xäsänov çığış yasadı.

Tatarstan başqortları qorıltayında Başqortostan premyer-ministrı urınbasarı Xäläf İşmuratov üz çığışında başqortlarnıñ ruxi, mädäni ixtıacların qänäğätländerü turında söyläde. Şulay uq ul Başqortostanda törle millät wäkilläreneñ yaxşı yäşäwen assızıqladı. Başqortostan xökümäte citäkçese Xäläf İşmuratov üz respublikasındağı tatarlarnıñ mäğärif, mädäni eşläre bik yaxşı oyıştırıluğa iğtibar yünältte.

Bälki qayber millättäşlärebez Ufada Tuqay bäyrämeneñ görläp ütüenä, mäktäplärdä tatar teleneñ härqayda yaxşı uqıtıluına ışanıp ta betmäs. Läkin Başqortostan citäkçelegeneñ räsmi argumentların iğtibarğa almıyça da mömkin tügel. Dälillärne raslağan yäki kire qaqqan dälillär bulsa ğına nigezle diskussiä alıp barıp bula. Tatarstan başqortları qorıltayında şulay buldı da. Ägär dä kiräk ikän, başqortlar öçen mäktäbe dä, mädäniät, matbuğat çaraları da buldırılır, digän wäğdä birelde.

Başqort qorıltayı citäkçese Niäz Mäcitov häm Tatar kongressı citäkçese İndus Tahirov bu qorıltayda çığış yasadılar. Alarnıñ härqaysı näq şul könnärdä xalıq sanın aluğa äzerlek mäsäläsendä qapma-qarşı eçtälekle mäqälälär bastırsalar da, üz çığışlarında milli üseş, duslıq turında söylädelär. Şulay uq milli mänfäğätlärne qayğırtqanda yalğan taratmasqa, xaqiqätne yaqlarğa çaqırdılar. Qorıltayda Bötendönya başqort qorıltayına 6 delegat saylandı. Tatarstan başqortlarınıñ avtonomiäse tözelü turında qarar qabul itelde. Anıñ citäkçese itep Firdäwes Bäşirova saylandı.
XS
SM
MD
LG