Accessibility links

дүшәмбе, 5 декабрь 2016, Казан вакыты 15:39

Tuqay mäydanında metro tözeleşe tuqtatıldı


Tuqay mäydanında metro tözeleşe tuqtatıldı

Başta ber texnologik macara turında xäbär. Qazannıñ näq üzägendä Tuqay mäydanı yanında metro tözeleşe tuqtalıp qaldı. Yäkşämbegä qarşı kiçtä cir astındağı şuşı tözeleş qotlovanına su kerä başlağan. Şunda eşlägän Belarus traktorı kabinasına qädär su eçendä qalğan. Taşqın minutına 350 kubometr su kitergän. Qayber başqa mexanizmnar da su astında qalğan. Cir astında su ağımnarı oçrawı ğäcäp tügel, ämmä bu yulı su ağımınıñ qayan kilgänlegen tögäl genä äytep bulmıy. Beräülär äytä, borınğı zamannardan qalğan ağaç tonnel' aşa su kilgän di, ikençelär – metro tözegän cirdän astaraq bilgesez su yulı bulırğa mömkin, dip sanıy. Metro stansiäsennän ber çaqrımda Qaban küle cäyelep yatqanın iskä alsañ, su taşqınınıñ küläme ğäcäpländermi. İñ möhime, metro trassası häm su aqqan urınnan 25 metrda Tatarstan yäşlär eşläre häm sport ministrlığı binası urnaşqan. Xäzer bu minstrlıqnıñ qäğäzläre Sport sarayına häm başqa urınnarğa küçerelä, xezmätkärlär binadan çığarılğan. Menä şuşı ğädättäntış xäl turında ber täülektän artıq berkemgä dä diärlek bilgele bulmadı. Barı tik İntertat.ru internet gazetası ğına Qazan metrosın qazunıñ tuqtalıp toruı turında reportaj urnaştırğaç qına, macaranı kiñ cämäğätçelek belde. İntertat.ru säxifäsendä tägärmäçläre suğa batqan traktor, su ağıp çıqqan tözeleş divarı räsemnäre dä urnaştırılğan. Sport ministrlığı binası cimerelergä mömkin digän xäwefle faraz da äytelä. Belgeçlär fikerençä, ul bina cimerelüen cimerelmäs, ämmä taş divarlar auğanın awız açıp kötep tora torğan zaman tügel. Başqa taş töşkänçe ük operativ häm tulı mäğlümät bulu xäzerge zamannıñ eş stile.
XS
SM
MD
LG