Accessibility links

Кайнар хәбәр

Tatarstan yazuçılarınıñ XIV qorıltayı tämamlandı


Tatarstan yazuçılarınıñ XIV qorıltayı tämamlandı

Başqa ölkälärdä häm tarmaqlarda, Allağa şöker, faciğä, macaralar yuq. Uzğan atna axırında Älmät yanındağı Minnebay gaz eşkärtü zavodında yanğın çıqqannan soñ, tieşle çaralar kürelde. Zavod binası tulısınça yanıp betkän, dip äytü arttıru bulğan ikän. Bina häm qorılma öleşçä yanğan, barlığı 98 meñ sum, yäğni 3 meñ dollar çaması zıyan kilgän.

Ä menä Tatarstan yazuçılarınıñ XIV qorıltayında şaqqattırğıç fetnä, cancallar, säyäsi yanğınnar bu yulı kürenmäde. Älbättä, yazuçılar qızıp-qızıp bäxäsläştelär, idärä räisen tänqitlädelär. Ämmä, wäzğıät çamadan çığıp kitmäde. Mintimer Şäymievneñ çığışı, millätne böten itep qarau häm aña yärdäm itü, berläşü, tatarlıqqa däülät yärdäme turındağı fikerläre cämäğätçelekkä uñay tä’sir yasadı. Qorıltay eşe tönge säğät 12-dän soñ tämamlandı. İdärä räise itep yañadan Foat Ğälimullin saylandı. 39 däğwaçıdan 22 idärä äğzası yäşeren tawış belän saylandı. İdärägä kerä almıy qalğan 17 däğwaçınıñ isemnäre qızıqsındıradır. Mine dä qızıqsındıra. Läkin xäzergä idärägä kemnär kergänen, ä kemnärneñ tieşle tawışlarnı cıya almıyça töşep qalğanın äytep bulmıy. Xäyer, qorıltay ütkän, yäşärgä, eşlärgä kiräk. Prezident yazuçılarğa gonorarnı yaqın arada arttırırğa wäğdä itkän. Busı inde iñ qızıq yañalıq.
XS
SM
MD
LG