Bügen tirä-yaq möxitne saqlaw köne

5 iyün — Bötendönya tirä-yaq möxitne saqlaw köne. Barlıq dönya bu könne niçek bäyräm itäder, anısı bezgä bilgesez. Ä menä Qazanda bu tirä-yaq moxitne saqlaw könen bik zurlap bulmasa da, bäyräm itälär. Ğädättägeçä, balalar belän räsem yasaw, şiğerlär bäygese ütkärälär, tabiğätne yaratırğa, saqlarğa kiräklegen añlatalar. Xäyer, tabiğätkä monnan ällä ni zur fayda kilmi, älbättä. Läkin bu balalar üsep citkäç, alar bälki tiräk-yaq moxitkä xäzerge keşelärgä qarağanda yaxşıraq mönäsäbät kürsäterlär, digän ömettä qalası kilä. Çönki Tatarstan tabiğäte xäzerge köndä keşelär yärdämenä moxtac. Rusiä tabiği baylıqlar ministrlığınıñ Tatarstan komitetında bulıp ütkän matbuğat oçraşuında menä şuşı xaqta da söylände. Şulay uq anda «Tirä-yaq moxitne saqlau turında»ğı qanunğa 1 iyüldän ğämälgä keräçäk üzgäreşlär turında xäbär itelde. Mäsälän, tabiğätkä zıyan kitergän öçen ştraflar artaçaq. Bügenge köndä isä alar nibarı 50-100 sumnı ğına täşkil itälär ikän. Komitetta eşläwçe inspektorlarnıñ sanı da artaçaq. Bolar barısı da, komitet citäkçese Aleksey Kolesnik fikerençä, tabiğätne saqlaw çaraların tieşençä başqaruğa kiteräçäk.