Accessibility links

якшәмбе, 4 декабрь 2016, Казан вакыты 11:20

Tatar dönyası Sabantuylar ütkärä başladı


Tatar dönyası Sabantuylar ütkärä başladı

Tatar dönyası Sabantuylar çorına kerde. Häm alar xäzer bötenläy dä kötelmägän urınnarda ütkärelä. Uzğan atna azağında tatarnıñ şuşı bäyrämen bilgelärgä dip, Germaniädä yäşäüçe ber törkem millättäşlärebez Frankfurt şähäreneñ ber parkında cıyıldı. Keşe Tatarstandağı Sabantuylardağı kebek küp bulmasa da, anda tatarlar ber Frankfurktan ğına tügel, ä tönyaqtağı Achen şähärennän, könyaqtağı Augsburgtan, Erlangennan, Koblenztan da kilgän ide. Mäskäü häm Prağa qunaqları da bar ide. Tatar cırların uynatıp, tatarça biep alğannan soñ, älege ciınnıñ Sabantuy buluın raslap, çülmäk watu, qapçıq kiep yögerü, qaşıqqa yomırqa quyıp çabu kebek yarışlar uzdırıldı. Uñğannarğa tatar cırları yazılğan kassetalar häm kompakt-disklar birelde. Soñraq bäyräm şuşı Sabantuyın oyıştırğan Bari Dianov fatirında däwam itte. Dianovtan tış oyıştıru eşlären Ğaliä Taysina häm Radik Wäliullin dä alıp bardılar. Germaniädäge millättäşlärebez Frankfurt Sabantuyınnan nığraq elemtädä torırğa kiräk digän fikerdä taralıştı. Bilgele bulğança, Germaniä başqalası Berlinda tatar-başqort cämğıäte dä bar. Tatar aşları, tatar cırı, tatar biüe belän uzğan bu ciın, tatar dönyasında Sabantuylar çorın başlap cibärde diärgä bula. Tizdän inde Tatarstanda da görläp Sabantuylar uzaçaq. İsegezgä töşerep ütik, respublikanıñ awıl, rayonnarında bu borınğı, milli bäyräm 8-9 iyündä uzaçaq. Ä Qazanda isä Sabantuy 23 iyündä ütärgä tieş. «Azatlıq» radiosı öçen Tatarstan xäbärläre belän Qazannan Gölnaz İlgizär.
XS
SM
MD
LG