Accessibility links

чәршәмбе, 7 декабрь 2016, Казан вакыты 17:19

Latinğa küçü bulırmı?


Latinğa küçü bulırmı?

Pänceşämbedä Däwlät Dumasında tatar xalqın yänä ber mäsxärädelär. Äye, añlağansızdır inde: süz küpçelek deputatlar tarafınnan qabul itelgän «Rusiä xalıqları telläre turında»ğı qanunı turında bara. Anıñ nigezendä däwlät telläre fäqät kirillitsa imlasendä genä alıp barılaçaq. Bu xaqta «Azatlıq» radiosı uzğan tapşıruda täfsilläp söyläde. Şuña da älege şovinistik ruxta icat itelgän qanunğa reksiä turında ğına äytäse kilä. Tatarstannan saylanğan Duma deputları bezne tağın ber qat ğäcäpländerdelär. Nibarı ike deputat Fändäs Safiullin häm Nail Xösnetdinov qına millätlärneñ tabiği, üzläre niçek teli şulay yaqlap çıqtılar. Ä ikese -- Şaşurin häm Äxmätxanov üzlären küptän inde kirillitsa tarafdarları belderdelär. İñ möhim waqıtta -- tawış birgändä, qalğan deputatlar yä bu çarada qatnaşmağannar, yä zaldan çığıp şılğannar. Monısı inde saylawçılarğa zur sabaq. Alda äle tağın saylawlar bulır -- menä şul çaqta bitaraf qalırğa, teläse kemne saylasınnar dip çittä torırğa niätlänüçelär beraz uylasınnar ide. Dumanıñ bu ğämäle Tatarstan cämäğätçelegen ni däräcädä borçıdı?

Pänceşämbedä «Efir» telekanalı oşbu waqiğanı kön teması dip atadı häm aña qarata äytelgän fikerlärne bäyän itte. Comğa könne dönya kürgän urıs telle Qazan matbuğatı da bu temanı iğtibarsız qaldırmadı. “Восточный экспресс” gazetası, mäsälän, oşbu xaqta «День национального унижения» digän bik sallı mäqälä bastırıp çığardı. Ä menä milli mäğlümät çaraları üzläreneñ reaksiäsen kürsätmiçä, yänä ber ğacäpländerdelär. Äyterseñ lä, süz tatar turında tügel, bötenläy başqa planetada yäşäwçelär turında bara. Küñelsez waqiğa. Şulay da latinğa küçü mäsäläsendä fikerläre härdaim açıq bulğan Fändäs Safiullin da, Bötendönya tatar kongressı räise İndus Tahirow ta çığışlarına optimistik ruxta tämamladılar. Yänäse, oşbu problemanı çişü yulları bar. Qayda soñ ul yullar? Bu xaqta açıq äytelmäde. Oçında älegä utlar kürenmi. Nik disäñ, berençedän, latinğa küçü mäsäläsendä tatar üze dä berdäm tügel. Kemder teli, kemder telämi. İkençedän, qanuni räweştä Mäskäwdä qabul itelgän qararnı Qazan niçek inqar itsen?! Bälkem, abruylı ağaylar Tatarstannıñ iñ köçle artilleriäse prezident Mintimer Şäymiewqa ömet bağlıylardır. Yänäse, soñğı çiktä ul Rusiä prezidentına barıp, tägärmäçne kiregä äyländerer. Äyländerer mikän? Prezidentnıñ da «äydägez bügennän latinğa küçik» dip özderep äytkäne yuq bit äle.

Qısqası, millätne borçığan bu mäsäläneñ optimistik räweştä xäl itelüenä ışanırğa töple nigez xäzergä kürenmi.
XS
SM
MD
LG