Accessibility links

шимбә, 10 декабрь 2016, Казан вакыты 15:43

Çallı Sabantuyına Sergey Kirienko kötelä


Çallı Sabantuyına Sergey Kirienko kötelä

Cäyge yallar, Sabantuylar, xättä, futbol dönya çempionatı da säyäsätçelärneñ küñelen tınıçlandırmıy. Xättä, Mäskäüdäge mäğlüm waqiğadän - futbol fanatları pogrom oyıştırğannan soñ da, täübägä kilü yuq. Süz uñayınnan, pogrom tatarçağa tärcemä itelmi. Süzlektä barı tik berär millät xalqın yäki xalıqnıñ berär törkemen talaudan, cäberläüdän, küpläp üterüdän ğibärät bulğan şovinistik xäräkät, digän añlatma bar. Menä şul pogromnan soñ da Mäskäü säyäsätçese Vladimir Jirinovskiy 12 yündä Mäskäüdä uzğan mitingta aziälälergä häm afrikalılarğa Rusiädän qaytıp kitärgä täqdim itte, dip xäbär itä “İnterfaks” agentlığı. Ä mäğlümät çaralında birgän ber intervyusında Jirinovskiy Rusiä futbol komandasına inde qaytu yulına biletlar alıp quyılğan, dip tağın da wäswäsä tarattı. Sabantuylarına da nindi dä bulsa, Mäskäü türäse kiläse bulsa, monnan nindider zur büläk yasıylar. Kasyanov kilä dip, bıyıl da Arça Sabantuyın ber kön aldan ütkärdelär.

İnde xäzer Çallı Sabantuyına Sergey Kirienko kilä, dip mäş kiläbez. Sabantuyına kiler aldınnan İntertat.ru, tizdän ul Mari İlda milli mäsälälär buyınça kiñäşmä ütkärä, digän xäbär tarattı. İnde bu mäsälägä qarata Sergey Kirienkonıñ aldan äytep quyğan tügäräk süzläre dä mäğlüm. “Hiçşiksez, milli problema härwaqıt iñ neçkä problema. Ber yaqtan anda şäxes mänfäğätläre küp, ä ikençe yaqtan, min añlıym, kierenkelekneñ ber öleşe milli mäsälägä qarağanda, säyäsi bäxäslär häm konfliktlarda milli mäsälälärne qullanuğa bäyle”,- digän İdelbuyı federal' okrugınıñ tulı wäqälätle wäkile. Bik xup, näq östenä bastığız, dip äytäse dä soñ, läkin Sabantuylarğa kilep, tatar käläpüşe kiep, yılmayıp, tügäräk-tügäräk süzlär söyläp kitü ber närsä, ä säyäsät -- ikençe närsä. Sabantuylardan qaytıp kitkäç, qanunnarın täñgälläştermilär, tatar mänfäğätlären alğa sörälär digän şiqäyätlär bula. Şuña kürä Tatarstanda da säyäsätçelärgä, cämäğät eşleklelärenä uyaw bulırğa turı kilä.
XS
SM
MD
LG