Rusiä Dumasınıñ latinğa qarşı gämälen xättä “Московский Комсомолец” tänqitli

Rusiä Däülät Dumasınıñ berençe uqılışıta “Rusiä Federatsiäse xalıqları telläre turında” östämä kertü turında qanun qabul itep, barlıq xalıqlarğa da kirillitsa belän yazu mäcbürilege kilep basqaç, Tatarstanda, näq menä Sergey Kirienko äytkänçä, säyäsi bäxäslärdä milli mäsäläne qullanuğa bäyle kierenkelek arttı. Küptän tügel respublikanıñ Aqsaqallar Şurası Mintimer Şäymievkä möräcäğät itte. Rusiä Däülät Dumasınıñ älege ğämäle oyatqa qaldırdı, axrı. Qazanda Mäskäü yaqlı jurnalist Lev Ovrutskiy bu mäsälädä Dumanıñ xaqsızlığın añlap, hiçşiksez, respublikalarda nindi imlada yazu xoquqı – üzlärendä, monda federal' qanunnar belän basım yasalırğa tieş tügel digän fikeren belderde. Xättä, Lev Ovrutskiy eşlägän “Moskovskiy komsomoles v Tatarstane” gäzite latin imlasına küçüne yaqlap, imzalar cıyuğa kereşkän. Jurnalist Lev Ovrutskiy belän yaxşı tanışıp ölgergän ikençe ber jurnalist Tälğat Barıev bu pozitsiä üzgäreşenä ışanıp ta betmi.