Accessibility links

Кайнар хәбәр

Başqort qorıltayı turında Qazanda närsä uylıylar?


Başqort qorıltayı turında Qazanda närsä uylıylar?

Ufada uzğan şimbädä tämamlanğan Bötendönya başqortları qorıltayı Qazanda zur qızıqsınu uyattı. Xäzergä bu qorıltaynıñ niçek ütüe turında mäğlümät küp tügel. Mintimer Şäymiev çığışında radikal' fikerle başqort ğalimnäreneñ millät tarixı turındağı äkiätlären faş itü, xalıq sanın alğanda basım yasawnıñ urınsızlığı, härkemneñ üze bulıp qalırğa tieşlege, üz ixtıarı belän cawap birergä tieşlege çınnan da bik küplär öçen yañalıq. Ufada yäşäwçe jurnalist, “Kommersant” gäciteneñ üz xäbärçese Gölçäçäk Xannanova barı tik Mintimer Şäymievtän genä tatar milläten 4-5 kisäkkä bülgäläw turında işetkän ikän. Dimäk, bu qorıltayda yañğırağan barlıq çığışlarnı da öyränü kiräk.

Älbättä, süz barı tik başqortlar turında ğına barmıy. Nigezdä rus telendä barğan älege qorıltayda milli problemalarnı xäl itü turında yaña fikerlär küp yañğıramasa da, däwlätneñ iqtisadi häm sotsial' tarmaqlarnı üsterüe yaxşı tasfirlandı. Qazan cämäğätçelege başqort qorıltayında ğädäti yañğırağan qayber fikerlärneñ çınnan da tormışta küzätelüenä ışanmıy. Äytik, Asaba cirlären başqort millätenä qaldırıp, cir satunı tıyunıñ Rusiädä ğämälgä kerüenä ışanuı awır. Başqortostanğa küçüçe törle millät wäkillären çikläü mömkinlege Tatarstanda küz aldına da kilmi. Sin tatar, şuña kürä Tatarstanğa küç, ä sin – urıs yäki çuaş, yäisä üzbäk, äzerbäycan dip belderü – fantastika bulıp tıyıla. Härxäldä, millät buyınça migratsiäne çikläw Tatarstanğa berqayçan da röxsät itelmäde. Yuğarı mäktäplärgä ayırım millät wäkilläreneñ kvota buyınça alınuı da Tatarstanda fantastikağa oşağan. Ä Başqortostanda bu ğädäti närsä. Ufa aviatsiä institutı rektorı Salawat Kusimovnıñ çığışında Başqort milli elitasın maxsus şartlarda äzerläwgä tänqitçän qaraw, şulay uq şaqqatıra. Dimäk, başqort cämäğätçelege arasında da demokratik, obyektiv fikerne milli ideyädän östenräk quyuçılar bar ikän. Salawat Kusimov kvota buyınça maqsatçan programma belän yuğarı mäktäpkä alınuçı başqort yäşläreneñ üzläre yäşägän töbäklärgä qaytmaw oçraqlaru turında da äytte. Salawat Kusimov äytüençä, başqort yäşlären maxsus l'gota belän uqırğa alu kiläçäktä dä däwam ittereläçäk. Tik monı aqıllıraq itep, tikşerep oyıştırırğa kiräk ikän. Äytkänemçä, tatar yäşläre mondıy östenleklär turında küptän xıyallana.
XS
SM
MD
LG