Accessibility links

Кайнар хәбәр

Tatarstan jurnalistlarınıñ qorıltayı ütte


Tatarstan jurnalistlarınıñ qorıltayı ütte

Çärşämbe, 19 yün könne, Qazanda Tatarstan jurnalistlarınıñ XVI qorıltayı ütte. Anıñ eşendä Tatarstan xökümäteneñ vitse-premyerı Zilä Wälieva, respublika Däülät Şurasınıñ wäkile Robert Miñnullin qatnaştı. Xäyer, qorıltayğa cıyılğan jurnalistlarnı alar ğına qänäğätländermäde buğay. Qayberäülär, nigä şuşındıy märtäbäle cıyılışqa respublikanıñ iñ zur däräcädäge citäkçeläre kilmäde, digän soraular da birde. Qorıltayda jurnalistlar, ğädättägeçä, üzläreneñ problemaların tikşerdelär, soñğı qorıltaydan soñ ütkän 3 yılda eşlängän eşlärgä näticälär yasadılar, kiläçäk turında söyläştelär.

Cıyılışta, şulay uq, yañadan berlekneñ räisen saylau da buldı. Äytergä kiräk, cıyın şaqtıy canlı bardı. Jurnalistlar berlege räise Rimma Ratnikovağa da üz isemenä maqtau ğına tügel, ä şaqtıy tänqit süze dä işetergä turı kilde. Qorıltay aldınnan “Respublika Tatarstan” gäcitenä birgän äñgämäsendä Rimma xanım, min bu wazifağa kereşkändä respublikanıñ jurnalistlar berlege tarqalu stadiäsendä ide. İdärä wäkilläre belän berlektä bez bik küp köç quyıp üzebezneñ oyışmanı tieşle däräcägä kütärdek. Rusiädä Tatarstan berlege iñ yaxşılardan sanala, dide.

Şunısın da äytergä kiräk, bu qorıltaynı respublikada jurnalistlar ğına kötmäde. Çönki qayber mäğlümätlärgä qarağanda, küptän tügel genä süzçesez qalğan prezident Miñtimer Şäymievneñ matbuğat üzäge citäkçese itep näq menä Rimma Ratnikova bilgelänäçäk ide. Bu oçraqta inde ul üzeneñ räis wazifalarınnan baş tartırğa tieş. Läkin Tatarstan jurnalistlar berlege qorıltayında Rimma Ratnikova berlekneñ räise itep yañadan saylandı.
XS
SM
MD
LG