Accessibility links

Кайнар хәбәр

Qazanda barğan çaralarda 25 ildän qunaq qatnaşa


Qazanda barğan çaralarda 25 ildän qunaq qatnaşa

Bu arada Qazanda uzğan çaralardan başlar äylänä, jurnalistlar qaysına, niçek ölgerergä belmi. Äyterseñ lä, bar dönya bezgä cıyılıp kilde. Baqsañ, härber qunaq eş belän yöri ikän.

Şähär administratsiäse, bilgele inde, berençe çiratta üz qunaqları, yäğni UNESCO häm Yevropa Şurası bayrağı astında cıyılğan «tarixi şähärlärdä mädäniätneñ küptörlelege -- totrıqlı kiläçägenä açqıç» digän xalıqara simpoziumğa kilüçelärne qayğırta. Räsmi xäbärlärgä qarağanda, Qazanğa 25 ilneñ 54 şähärennän eşlekle qunaqlar kilgän. Pänceşämbedä alar Kremlne qaradılar, Qazan däwlät universitetında, milli kitapxanälärdä, mäçetlärdä, çirkäwlärdä buldılar. Şul uq könne töştän soñ qunaqlar Qaban külendä köymädä säyäxät qılıp İske tatar bistäsen xozur qıldılar. Comğa könne tarixi şähärlär wäkilläre «Qazan» milli mädäniät üzägendä simpoziumnıñ plenar utırışında qatnaştılar.

İkençe ber çara da xalıqara digän isemgä iä. «İdel-Ural töbägendä xristian dine: tarix häm mädäniät» dip atalğan fänni-ğämäli konferensiädä qatnaşuçılar Qazanda törle din wäkilläreneñ uzara añlaşıp, ber-beren xörmät itep yäşäwneñ täcribäsen öyränälär, kiläçäçktä urtaq proektlar tözep mädäni dini elemtälärne nığıtu turında uylanalar. Comğa könne möselmannar namazğa utırdılar, ä xristiannar köymädä yözep Qazannıñ matur urınnarın qarap qayttılar. Menä şundıy ul bezneñ başqalabız, Yevropa-Aziä qapqası -- törle konfessiä wäkilläre kileşep yäşägän yäşel bişek.
XS
SM
MD
LG