Accessibility links

чәршәмбе, 7 декабрь 2016, Казан вакыты 21:30

Tellär turındağı qanun qabul itelügä 10 yıl


Tellär turındağı qanun qabul itelügä 10 yıl

Bıyıl Tatarstannıñ tellär turındağı qanunıñ qabul itüenä 10 yıl tula. 90-nçı yıllar başında uram cıyınnarında qatnaşqan keşelärneñ, dönya buylap sibelgän tatarlarnıñ tuğan telneñ üseşenä bulğan ömetläre şuşı qanunğa bäylängän ide. Älege qanun 1992 yılnıñ 8 yülendä qabul itelgän bulğan. 1994 yılda isä, Tatarstan xökümäte şuşı qanunnı ğämälgä kertü programmasın eşläp çığarğan, aqçalar bülgän, cawaplı keşelärne bilgelägän.

Şunnan soñ şaqtıy waqıt uzdı. Ämmä, tatar tele däülät tele bula aldımı, tormışnıñ här tarmağına ütep kerä aldımı? Küplär iğtibar itüençä, elekke yıllarda bulğan kütärenke rux, nıqlı ışanıç, telneñ üseşe äkren-äkren sülpänäyä bara. Tatarstan Däülät Şurasınıñ mäğärif, tellär, milli mäsälälär komissiäseneñ räise Räzil Wäliev tä «Azatlıq»qa birgän intervyusında şular xaqında söyläde. Qanunnıñ un yıllığın bilgeläp ütü yözennän Räzil äfände citäkçelegendäge komissiä ütkän yıllarğa yomğaq yasıy. Küptän tügel şundıy näticälär çığaru Balıq bistäse rayonında ütkän. Räzil Wäliev şaqtıy eşlär eşlängän dip, citeşsezleklär xaqında da äytmi qalmadı. Küpçelek qanunnar, programmalar kebek ük, tellär turındağı zakon da tieşle däräcädä tormışqa aşırılmağan.

Tatarstan zıyalıların tatar teleneñ sänäğät oyışmalarına ütep kerä almawı, milli mägärifneñ balalar baqçasınnan başlap, yuğarı uqu yortına qädär kamil formada oyışıp betä almawı, elekke yıllardağı aktivlıknıñ sülpänäyüe, tatar telen öyränü öçen tiyeşle şartlar tudırılmawı ayıruça borçıy ikän. Räzil Wälievnıñ äytüenä qarağanda, qanunnı tormışqa aşıru programmasına da üzgäreşlär kerteläçäk. Anıñ ütälü ixtimallığın arttıru öçen Däülät Şurasınıñ milli komissiäse şuşı qanunnı bozğan öçen cawaplılıq turında mäsäläne dä kütärep çıqtı. Räzil Wäliev Tatarstan Konstitutsiäsenä üzgäreşlär kertkändä, böten qanunnar, qararlar ike däülät telendä qabul itelergä tieş, digän cömläne kertterdek dip, ğorurlanıp yöri. Şunnan soñ, tellär turındağı qanunnı bozğan öçen ştraflar tüläü xaqındağı tözätmäne parlamentta qabul itä alsaq, di ul, tatar teleneñ üseş programması yaña sulış alıp, qolaç cäyep eşli başlıyaçaq, digän farazlar äytä Räzil Wäliev.
XS
SM
MD
LG