Accessibility links

Кайнар хәбәр

Törkiyä futbolçılarına Qazanda da köç birep toruçılar buldı


Törkiyä futbolçılarına Qazanda da köç birep toruçılar buldı

Çärşämbe könne Qazanda da futbol çempionatı uyınnarın, ä tögälräk äytkändä, Törkiä-Brazilia uyının ayıruça borçılıp küzätep baruçılar buldı. Tatarstanda meñgä yaqın törek yäşi dip isäplänä. Biredä alar tözeleştä eşli, kiem-salım, törek aşların satıp kön kürä. Tatarstanda Törkiäneñ ilçelege dä eşläp kilä. Törek futbolçıları öçen millättäşlärebez dä can atırğa äzer bulıp, eşne taşlap, uyınnı qaradı. Şunısı qızıq, möhäcirlektä yörgän millättäşlärebez arasında Törkiädä üskän tatarlar baytaq. Şuña kürä, alarnıñ da törek futbolçıları öçen borçılıp yörüläre añlaşıla. Qazan Sabantuyına kilgän millättäşlärebez, Amerikanıñ San-Fransisco’da yäşäüçe Roqıya Safa xäbär itüençä, anıñ ire, Amerika tatarlarınıñ imamı Abdul Dayan Safa häm anıñ bergä üskän tatar dusları, futbol çempionatı uyınnarın qararğa dip, Yaponiägä kitep barğan. Alar uyınnı üz küzläre belän kürü bäxetenä ireşkän, di Roqıya Safa. Alar anda nindi xislär kiçergännärder, älegä bilgesez. Törkiä 1:0 xisabı belän ottırdı häm şimbä könne Korea belän 3-nçe urın öçen uynıyaçaq.

Qazandağı futbol yaratuçılarnıñ qızğan başların suıtu öçen uramğa çığu, watu-cimerü, ber-bersen qıynau xaqında tärtip saqlauçı oyışmalarda mäğlümätlar yuq. Kön şaqtıy tınıç ütte, dip xäbär itelä.

Futboldan soñ, ğomüm sport temasına küçik. Comğa könne Qazanğa sport eşlären bağuçı federal' ministr Vyaçeslav Fetisovnıñ kilüe kötelä. Yaña bilgelängän türä Tatarstanda sport belän massaküläm räweştä şögellänüneñ torışı belän tanışırğa teli. Şunıñ belän bergä ul, Qazan kremlendä “Aq bars” xokkeyçıların häm “UNIKS” basketbolçılarin büläklärgä ciyına.

Tatarstan xäbärlären Azatlıq radiosı öçen Bikä Timerova äzerläde
XS
SM
MD
LG