Accessibility links

сишәмбе, 6 декабрь 2016, Казан вакыты 19:02

Tatarlarnıñ yaña kütäreleşe.


Tatarlarnıñ yaña kütäreleşe.

Bıyılğı cäyneñ üzençälege - tatarlarnıñ yaña kütäreleşe, terelügä omtılış, III Bötendönya Tatar Kongressına äzerlek. Citmäsä, üktäbr ayında xalıq sanın alu kötelä. Sanağanda da bäla bula ikän. Şuşı arada Mäskäwdä mägärif kiñäşmäsendä qatnaşqan Qazan ğalimäse şaqqatırğıç ber mäğlümat alıp qayttı. Rusiä Ministrı Vladimir Zorin federatsiäneñ küp millätle buluın bolay añlatqan :“Rusiädä iñ kübese urıslar yaşi, annarı – ukrainnar, öçençe urında – tatarlar” digän ul. Yalğış qına, tel töbennän ıçqınğan bu süzlär, qayberäwlärneñ yaman niätlären kürsätä. Niçek tä tatarnıñ sanın kimetep kürsätergä, borınğı zur millätneñ abruyın, däräcäsen töşerergä tırışalar. Bu şartlarda Tatarstan qaya qarıy? Cawap şul – tuğannarğa qarıy. Millättäşlärgä iğtibar artqanın soñğı waqıtta üzegez dä sizgänsezder. Uzğan şimbädä Perm şähärendä oyıştırılğan Saban tuyına Tatarstannan zur wäkilçelek bardı. Bu xaqta Intertat.ru – internet gäziteneñ tatar bülege citäkçese Älfiä Miñnullina menä närsälär söyli. 11 märtäbä Permdä Saban tuyı ütte. Tärtip saqlawçılar isäpläwençä, bäyrämdä 10-15 meñläp keşe qatnaştı. Saban tuyda ölkä xakimiäte wäkile, milli mäs’älälärne bağuçı gubernator urınbasarı Nikolay Yaşin qatnaştı. Ul anda çülmäk watıp qaradı. Çuyın çülmäk watılmasa da, çıñlap quydı. Tatarstan qunaqları Permdäge qärdäşlärenä büläkkä 2 meñ danä kitap alıp kilde. Alarnı bik quanıp qabul ittelär. Tübän Kama artistları tamaşaçılarnı Saban tuyı cırları belän dä söyenderde. Permgä barğan delegatsiädä Däwlät Şurasınıñ daimi komissiäse räise Färit Musin, tatarlarnıñ federal avtonomiäse cawaplı särkätibe Färit Urazayevnıñ qatnaşuı, wäkillçelekneñ Perm administratsiäse citäkçeläre belän oçraşuı älege Saban tuyınıñ ğadi ber tamaşa tügel ikänen kürsätä. Bu töbäkära diplomatiä häryäqqa da faydalı bulırğa tieş. Şulay uq, uzğan şimbädä bu bäyräm Yäkutiädä, Tubılda häm Tübän Novgorodta bulğan. Anda da bezneñ abruylı millättäşlärebez qatnaşı. Tatarstannıñ xalıq şağıre, “Qazan utları” jurnalınıñ baş möxärrire Rawil Fäyzullin Tübän Novgorodtağı Saban tuyınnan menä şundıy tä’sirlär alıp qaytqan. Ul yaqlarnıñ Saban tuyların kürğän yuq ide ale. Minem öçen bik ğıbrätle buldı. Bu yaq tatarlarınıñ tırış bulğanına tağın ber qat inanıp qayttım. Ädäbiätebez tatar ädäbiäte bulsın disäk, bez, böten Tatar dönyasınıñ ruxi dönyasın çağıldırırğa tiyış. Anı şuşı töbäk icatçıları yazmasa, kem yazsın. Bezneñ yaqtan, bu töbäktäge tatarlarnıñ milli xisen üsterü öçen nıqlabrak eşläsäk, Nicgar tatarlarınıñ kiläçäğe ömetleräk bulır ide. Saban tuyları epopeyası kiläse yal könne, Mäskäwdä däwam itäçäk. İzmaylovo parkında ütäçäk bu bäyrämdä Tatarstan Prezidentı Mintimer Şäymiev yäki Däwlät Şurası räise Färit Möxämmätşin qatnaşırğa mömkin. Bäyrämnär matur, axırı niçek bulır.
XS
SM
MD
LG