Accessibility links

якшәмбе, 4 декабрь 2016, Казан вакыты 06:59

«Tatarstan - yaña ğasır» xäräkäte latin grafikasın yaqlıy.


«Tatarstan - yaña ğasır» xäräkäte latin grafikasın yaqlıy.

«Tatarstan - yaña ğasır» xäräkäte üzeneñ 3 yıllığın bilgeläp ütä. Sişämbe könne bu xäräkätneñ säyäsi şurası ciıldı. Anda qabul itelgän ber qarar bezneñ iğtibarnı da cälep itte. Tatarstan mänfäğätlären yaqlap kilgän bu säyäsätçelär, Rusiä Däwlät Duması deputatlarına möräcäğät itte. Älege dokumentta, latin grafikasın tıya torğan tözätmäneñ qabul itelüe, tatar xalqınıñ üz telen üsterü mäs’älälären möstäqıl xäl itügä xoquqın bozu häm Tatarstan eşlärenä tıqşınu, dip bäyälänä. «Tatarstan - yaña ğasır» xäräkäte duma Deputatların şuşı problemanı tikşerügä yañadan äylänep qaytırğa çaqıra. «Bügen Däwlät Duması aldında çınlıqta latin yäki kiril imlasın saylap alu tügel, ä federalizmmı, unitarizmmı, Rusiäneñ etno-mädäni problemaların demokratik häm avtoritar ısullar belänme xäl itü probleması tora», — dielä älege möräcäğättä. Xakimiätkä yaqın torğan elege xäräkät küp oçraqlarda räsmi qaraşnı belderep kilä. Bu añlaşıla da. Anıñ säyäsi şurasında Prezident kiñäşçese Rafael Xäkim, yış qına killeşterü kommissiälärendä eşläwçe deputat Marat Ğaliev äğzä bulıp tora. Ä xäräkätneñ yulbaşçısı — Däwlät Şurası räise Färit Möxämmätşin. Soñğı ciılışta bu säyäsätçelär aktivlıqların arttıru teläge turında iğlan itte. Säyäsi firqälär turındağı federal qanunda kürsätelgänçä, parlament saylawlarında regional' xäräkätlär qatnaşa almıy. Ämma «Tatarstan— yaña ğasır»nıñ barıber säyäsättän kitäse kilmi. Çärşämbe könne Färit Möxämmätşin, xäräkätneñ matbuğat klubında jurnalistlar häm internet qullanuçılar sorawına cawap birde. Oçraşu xäräkätneñ web-bite häm Intertat.ru säxifäse aşa internetta tapşırıldı. Färit Möxämmätşinğa sorawlar birergä telägän härkem, internetta, maxsus bilgelängän säxifälärdä fikerlären yazıp qaldıra aldı. Mäsälän, andıy täqdim Intertat.ru säxifäsendä ber ay çaması elenep tordı. Oçraşuda Färit Möxämmätşinğa kübräk däwlät eşleklese, parlament räise bularaq cawap birergä turı kilde. Qazan-Mäskäw arası, Konstitutsiä, Şartnamä östendä eşläw, parlamentnıñ taratılu qurqınıçı, latin grafikasınıñ kertelüe häm kertelmäwe xaqında da sorawlar birelde anda.
XS
SM
MD
LG