Tatarstan xökümätendä uzğan yartı yılda küpme aqça kergän, küpme tuzğannı sanadılar

Mäğlüm ki, bezneñ yäşäw aqçağa bäyle. Cäyge çellägä qaramastan, Tatarstan xökümätendä pänceşämbedä cidti eş - uzğan yılda küpme aqça kergän küpme tuzğannı sanaw belän şöğellländelär. Baş xisapçı rolen bilgele inde premyer-ministr Röstäm Minnixanov başqardı. Älege kiñäşmädä yaña bilgelängän finans ministrı Radik Ğäyzatullin täwge çığışın yasadı. Ber yäqtan qarağanda, yılnıñ berençe yartısında büdjet şaqtıy aqça tuplağan häm söykemle kürenä. Sannarda ul bolay: küzdä totılğan 23 milliard sum urınına - 25 milliard. Läkin tuplanğan keremneñ strukturasın, yäğni nidän ğibärät ikänen açıqlıy başlağaç, maqtanırğa irtäräk dip äytäse kilä. Çönki xökümät zur külämdä salım tüläwçelärgä äcätkä kergän ikän häm alarnı ikençe yartıyıllıqqa kire qaytarası bar. Premyer-ministr bu xaqta häm iske çir - qazna aqçasın äräm-şäräm itüçe rayonnar turında qatı tänqit süzläre qullandı. Finans ministrlığınıñ maxsus idaräse uzdırğan tikşerülär kiläçäktä prokuratura oyışmalarına tapşırılaçaq, ğayeplelärgä ştraflar da bermä-ber artaçaq. Möña xätle dä tikşerülär bula ide, läkin yış qına qulınnan totılğan citäkçelär sudan qorı çığa ide. Qayberäwlär ber cılı urınnan ikençesenä küçerelep utırtıla ide. Küräseñ, kiläçäktä xällär beraz üzgärer. Büdjetnıñ Mäskäw faydasına eşli başlawın iskä töşersäk, elekkege kebek aqçada yözülär betmäsä dä azayır axrısı.