Qazan yanındağı “İdel” lagerenda “Tatar yäşläre könnäre” däwam itä.

Tatarstanğa ber atnağa ğına ciılğan yäş millättäşlärebez waqıtların zayağa uzdırmasqa tırışalar. Şuña kürä şaqtıy ğına aktiv barğan tormış xättä kiçlären dä tınıp qalmıy. Kiçke uyınnar, aralaşular, söyläşülär töngä qädär däwam itä. Sişämbe könne tatar yäşläre Qazanda çığuçı gazeta, jurnal möxärrirläre, jurnalistları belän oçraştılar. Oçraşuda “Söyembikä”, “Qazan utları”, “İdel”, “Yalqın” häm başqa basmalar wäkilläre qatnaştı. Alar üzläreneñ matbağaları turında, respublikada çığa torğan matbuğat, tatar jurnalistikası turında söylädelär, oçraşuda qatnaşuçılarnıñ küpsanlı sorawlarına cawap birdelär. Bügen çittäge tatar yäşläre Bolğarğa säyäxätkä kittelär.