Accessibility links

<br><br>Keçe biznesqa - zur yardäm… wäğdä itelä


Keçe biznesqa - zur yardäm… wäğdä itelä

Soñğı aylarda Qazan türäläre dä, respubika citäkçeläre dä ber ük balıq başın - keçe biznesnı canlandıru mäs’äläsen nıq kimerälär. Ällä zur biznestan fayda yuq, ällä qaznanı tutırırğa başqa ämäl yuq, bügen eşquarlıq berençe planğa çıqtı. Häm bu xaqta bik küp süzlär äytelä, programmalar, plannar tözelä. Türälärneñ qabalanuı berküpme quzğalıp kitkän poyezd artınnan yögerüne xäterlätä. Çönki Tatarstanda, bigräk tä, Qazanda eşmäkärlekne üsterü yışraq teldä häm käğäzdä buldı. Berniçä yıl elek bezneñ eşquarlar östämä salımnardan, mükle byurokratiädän rişwätçelektän qaçıp, kürşe töbäklärgä barıp terkäldelär. Çönki anda keçe biznesnı süzdä genä tügel, ğamäldä üsterergä kereştelär. Härxäldä, eşmäkärlärgä yul birdelär.

Qazan xakimiäteneñ soñğı könnärdä uzdırğan çaraları da kübräk iske zamannardağıça küz buyawğa qaytıp qaldı kebek. Mäsälän, sişämbedä uzğan Qazan eşquarlarınıñ III qorıltayında şähär xakimiätennän däräcäle citäkçelär kürenmäde. Eşmäkärlärneñ sorawlarına qorıltayda qatnaşqan premyer-ministrnıñ berençe urınbasarı Rawil Moratov cawap birergä mäcbür buldı. Qayber caysız sorawlar barıber hawada elenep qaldı.

Qazan şähär şurasınıñ pänceşämbedä uzğan, maxsus şuşı mäs’älägä bağışlanğan sessiäsendä alar açıqlanır, dip farazlandı. Sessiädä Tatarstan prezidentınıñ qatnaşuı da oşbu çara näticäle uzar digän ömetne bermäber üsterde.

Älege ciında töp çığışnı yasağan şähär xakimiäte başlığı Kamil İsxakov bügen Qazanda barlıq tawarlarnıñ häm tüläwle xezmät kürsätüneñ 31% eşquarlar öleşenä turı kilä, dip belderde. Eşmäkärlärneñ 60% yuğarı belemle, şähär şurasında utırğan här dürt deputatnıñ berse eşquar ikän. Keçe biznes tawığı yomırqanı äybät sala - şähär qaznasına kergän salımnıñ 15% - eşmäkärlärdän.

Läkin İsxakovnıñ kürkäm xisabın prezident Mintimer Şäymiev äledän-äle bülderep ayaz küktän mäşäqätle cirgä töşerde. İñ çeterekle mäs’älälärneñ berse - başqaladağı cirne häm milekne ğädel bülü. Baqsañ, Qazanda inde cirne dä, milekne dä birep, bülep betergännär ikän. Binalarnı arendağa alu da eşquarlar öçen başqatırğıç problema. Federal' qanun nigezendä xäzer alar auksionnarda satılırğa tieş. Ä bit eşmäkärlär älege binalarnı qayçandır taşlandıq xäldä alıp, baytaq aqça tügep, yasap, alarnı faydalanırğa kereşkännär ide. Dimäk, binalar da, anda kertkän aqçalar da başqa beräwlärgä tätergä mömkin. Sessiädä bu mäs’älägä cawap tabılmadı kebek.

Süz uñayınnan şunısın da äytergä kiräk, soñğı yıllarda şähär häm respublika oyışmaları arasında nindider kierenkelek, ber-berläre belän tartqalaşu, ayaq çalular bulğalap tora. Boları da, bilgele, eşmäkärlärne üsterügä nıq kirtä.

Yomğaqlap äytkändä, sessiä Qazanda eşquarlıqnıñ torışı, anı yaqlaw turında qarar qabul itsä dä, alarnı niçek itep ğamälgä aşıru yulları kürsätelmäde. Häm başqalabızdağı biznesnıñ kiläçäktä şawlap çäçäk atuına, tämle cimeşlär kiterüenä ömet zurdan tügel. Härxäldä yökneñ awırı eşmäkärlärneñ üz cilkäsendä qala birä. Ber aqıllı keşe äytmeşli, bälkem eşquarlarğa yardäm itärgä kiräkmi, alarğa qomaçawlamasqa ğına kiräkter?
XS
SM
MD
LG