Accessibility links

пәнҗешәмбе, 8 декабрь 2016, Казан вакыты 17:10

Qazan şähäre tatarları ciılışı


Qazan şähäre tatarları ciılışı

Ä menä Qazanda Bötendönya tatar kongressına kemnärneñ delegat bulıp baruı bilgele inde. Comğa könne “Qazan” milli-mädäni üzägendä ütkän ciılışta kongressqa 48 delegat saylandı. Alar arasında räsmi citäkçelärdän, törle oyışma wäkillärennän başqa milli xäräkättä bilgele bulğan Damir İsxakov, Ğayal Mortazin, Räşit Yağfarov, Färit Urazaev kebek cämäğät eşlekleläre dä bar. Qazan şähäre tatarlarınıñ konferensiäsendä şähär başlığı Kamil İsxakov çığış yasadı. Ul berençe tapqır zur çığış belän tatar telendä 5 yıl elek şundıy uq qorıltayda çığış yasağan ide. Üzeneñ dokladında Qazan şähäre başlığı 5 yıl elek başqala aldında quyılğan burıçlarnı iskä töşerde. Sanalğan burıçlarnıñ küpçelege 5 yıl eçendä ütälsä dä, başqarılmağan eşlär dä citärlek. Eş urınnarında tatar telen qullanu, uramnarnıñ milli yözen budıru öçen başqarası eşlär küp äle. Konferensiädä süz näq menä şul turıda bardı. Tatar kongressınıñ Qazan şurası räise Marat Lotfullin bu eşneñ niçek alıp barıluı turında yartı säğätlek doklad belän çıqtı. Şulay uq konferensiädä bilgele cämäğät eşlekleläre, ğalimnär, xalıq wäkilläre çığış yasadı. Tatar ictimaği üzäge räise Räşit Yağfarov TİÜneñ gazetalarda basılıp çıqqan belderüen, kongressqa täqdimnären yañğırattı. Äytergä kiräk, Räşit Yağfarovqa qädär yañğırağan çığışlarda da bäysez fikerlär, eşlekle täqdimnär az tügel ide. Citäkçelär tiräsendä butalıp yörüçelär genä tügel, möstäqil, xätta qarşı fikerle şäxeslär dä delegat bulıp saylandı. Konferensiä tribunasınnan äytelgänçä, xäzer respublika häm şähärneñ däwlät, idarä organnarı milli xäräkätne izu genä tügel, anı uyatır öçen dä şaqtıy köç sarıf itälär. Fikerle häm tänqitle çığışlar Qazan tatarları qorıltayında az bulmadı. Qazan şähäreneñ milli tormışın analizlaw öçen ayırım tapşırular kiräk. Älege konferensiädä alda torğan burıçlar turında qızıqlı ğına fikerlär, täqdimnär äytelde.
XS
SM
MD
LG